ಹೆಜಮಾಡಿ ಅಳಿವೆ ಬಾಗಿಲ ಕಡಲ ತೀರದಲ್ಲಿ ವಿಲೇವಾರಿ ನಿರ್ವಹಿಸಲಸಾಧ್ಯ ತ್ಯಾಜ್ಯ ಸಂಗ್ರಹ

ಪಡುಬಿದ್ರಿ: ಹೆಜಮಾಡಿ ಗ್ರಾಪಂ ವ್ಯಾಪ್ತಿಯ ಮೂಲ್ಕಿ ಅಳಿವೆ ಬಾಗಿಲ ಹೆಜಮಾಡಿ ಭಾಗದಲ್ಲಿ 2 ಕಿಮೀ ಗೂ ಅಧಿಕ ಉದ್ದಕ್ಕೆ ವಿಷಕಾರಿ ತ್ಯಾಜ್ಯಗಳು ಸಂಗ್ರಹಗೊಂಡಿದ್ದು, ಅವುಗಳ ವಿಲೇವಾರಿ ಬಹಳ ಕಷ್ಟಕರವಾಗಿ ಪರಿಣಮಿಸಿದೆ.
ಶಾಂಭವಿ ಮತ್ತು ನಂದಿನಿ ಹೊಳೆಗಳು ಸಂಗಮಿಸಿ ಸಮುದ್ರ ಸೇರುವ ಮೂಲ್ಕಿ ಅಳಿವೆಯ ಉತ್ತರ ಭಾಗ ಹೆಜಮಾಡಿ ಭಾಗದಲ್ಲಿ ವಿಷಕಾರಿ ಪ್ಲಾಸ್ಟಿಕ್, ರಬ್ಬರ್ ಮತ್ತು ಗ್ಲಾಸ್ ಬಾಟಲಿಗಳ ರಾಶಿ ರಾಶಿ ತೀರದಲ್ಲಿ ಸಂಗ್ರಹಗೊಂಡು ಈ ಭಾಗದಲ್ಲಿ ನಡೆದಾಡಲೂ ಕಷ್ಟಕರವಾಗಿದೆ.

ಪ್ರತೀ ವರ್ಷ ಮಳೆಗಾಲದ ಬಳಿಕ ಇಲ್ಲಿ ಬೃಹತ್‍ಮಟ್ಟದಲ್ಲಿ ತ್ಯಾಜ್ಯ ಸಂಗ್ರಹವಾಗುತ್ತದೆ. ಶಾಂಭವಿ ಮತ್ತು ನಂದಿನ ಹೊಳೆಯ ಮೂಲಕ ಸಮುದ್ರ ಸೇರುವ ನೆರೆ ನೀರಿನಲ್ಲಿ ಈ ಎಲ್ಲಾ ತ್ಯಾಜ್ಯಗಳು ಸಮುದ್ರಕ್ಕೆ ಬಂದು ಅಲ್ಲಿಂದ ನೇರ ಹೆಜಮಾಡಿ ಭಾಗದ ಕಡಲ ತೀರದಲ್ಲಿ ಸಂಗ್ರಹಗೊಳ್ಳುತ್ತದೆ.

ಈಗಿರುವ ಅಳಿವೆ ಪ್ರದೇಶದಲ್ಲಿ ಮನೆ ಹೊಂದಿ ಅಳಿವೆ ಸ್ಥಿತ್ಯಂತರಗೊಳ್ಳತ್ತಲೇ ಸುಮಾರು ನಾಲ್ಕು ಬಾರಿ ಮನೆ ಬದಲಾಯಿಸಿ ಪ್ರಸ್ತುತ ಕರಾವಳಿ ಕಾವಲು ಪಡೆಯ ಠಾಣೆ ಬಳಿ ಮನೆ ಹೊಂದಿರುವ ರಾಜೀವಿ ಎಂಬವರು ಹೇಳುವ ಹಾಗೆ 20-30 ವರ್ಷಗಳ ಹಿಂದೆಯೂ ಇದೇ ರೀತಿ ತ್ಯಾಜ್ಯ ಸಂಗ್ರಹವಾಗುತ್ತಿತ್ತು. ಆದರೆ ವಿಷಕಾರಿ ಪ್ಲಾಸ್ಟಿಕ್, ರಬ್ಬರ್ ಮತ್ತು ಗ್ಲಾಸ್ ಬಾಟಲಿಗಳು ಇತ್ತೀಚಿನ ವರ್ಷಗಳಲ್ಲಿ ಮಾತ್ರ ಕಂಡುಬರುತ್ತಿದೆ. ಇದನ್ನು ವಿಲೇವಾರಿ ಮಾಡಲು ಅಸಾಧ್ಯವಾಗುತ್ತದೆ. ಹಿಂದೆ ಪರಿಸರದ ಮನೆಗಳಲ್ಲಿ ಕಟ್ಟಿಗೆ ಉಪಯೋಗಿಸಿ ಅಡುಗೆ ಮಾಡುತ್ತಿದ್ದು, ಇಲ್ಲಿ ಸಂಗ್ರಹಗೊಂಡ ಕಸ ಕಡ್ಡಿಗಳನ್ನು ಸಂಗ್ರಹಿಸಿ ವರ್ಷವಿಡೀ ಒಲೆ ಉರಿಸಲು ಉಪಯೋಗಿಸುತ್ತಿದ್ದೆವು. ಆದರೆ ಇತ್ತೀಚೆಗೆ ಎಲ್ಲಾ ಮನೆಗಳಲ್ಲಿ ಗ್ಯಾಸ್ ಸಂಪರ್ಕವಿರುವ ಕಾರಣ ಇಲ್ಲಿ ಕಸ ಕಡ್ಡಿ ಹೆಕ್ಕಲು ಯಾರೂ ಬರುವುದಿಲ್ಲ. ಆದರೆ ನನ್ನ ಮನೆಯಲ್ಲಿ ಈಗಲೂ ಇದನ್ನೇ ಉಪಯೋಗಿಸುತ್ತೇವೆ. ಆದರೆ ವಿಷಕಾರಿ ತ್ಯಾಜ್ಯಗಳನ್ನು ಉಪಯೋಗಿಸುವುದಿಲ್ಲ ಎಂದಿದ್ದಾರೆ.
ಹೆಜಮಾಡಿಯ ಹಳೇ ಬಂದರು ಪ್ರದೇಶದಿಂದ ಪ್ರಸ್ತಾವಿತ ಬಂದರು ಪ್ರದೇಶಕ್ಕೆ ರಸ್ತೆ ಇಲ್ಲ. ಇಲ್ಲಿ ನಡೆದುಕೊಂಡೇ 2 ಕಿಮೀನಷ್ಟು ಕ್ರಮಿಸಬೇಕು. ಇದೇ ಪ್ರಸ್ತಾವಿತ ಜಾಗದಲ್ಲಿ ಕಂಡು ಕೇಳರಿಯದಷ್ಟು ವಿಷಕಾರಿ ತ್ಯಾಜ್ಯ ಸಂಗ್ರಹಗೊಂಡಿದೆ.

ಕೆಲವು ವರ್ಷಗಳ ಹಿಂದೆ ಹೆಜಮಾಡಿ ಗ್ರಾಪಂ ವತಿಯಿಂದ ಜೆಸಿಬಿ ಬಳಸಿ ತ್ಯಾಜ್ಯಗಳನ್ನು ವಿಲೇವಾರಿ ಮಾಡಲಾಗಿತ್ತು. ಆದರೆ ಅದೂ ವೆಚ್ಚದಾಯಕವಾದ ಕಾರಣ ಪ್ರತಿ ವರ್ಷ ವಿಲೇವಾರಿ ಮಾಡಲಾಗುತ್ತಿಲ್ಲ.

ಶಾಂಭವಿ ಮತ್ತು ನಂದಿನಿ ಹೊಳೆಗೆ ಮುಖ್ಯವಾಗಿ ಸೇತುವೆಗಳಲ್ಲಿ ದಾರಿಹೋಕರು ವಿಷಕಾರಿ ತ್ಯಾಜ್ಯಗಳನ್ನು ತಂದು ಸುರಿಯುತ್ತಾರೆ. ಅದು ನೇರವಾಗಿ ಸಮುದ್ರದ ಮೂಲಕ ಕಡಲತೀರ ಸೇರುತ್ತದೆ. ಇದರೊಂದಿಗೆ ಸತ್ತ ಪ್ರಾಣಿಗಳ ಶವಗಳ ಅವಶೇಷವೂ ಸೇರಿಕೊಂಡಿದೆ. ನೆರೆ ಸಂದರ್ಭ ದೊಡ್ಡ ಮರಗಳೂ ಕಡಲತೀರ ಸೇರಿಕೊಂಡಿದೆ. ಕೆಲವೊಂದು ಬೃಹತ್ ಮರಗಳ ಕಾಂಡ ಸಮುದ್ರದ ನೀರಿನಲ್ಲಿ ಹಾಗೂ ಸಮುದ್ರ ತೀರದಲ್ಲಿ ಮರಳಿನಡಿ ಸೇರಿಕೊಂಡು ಸಾಂಪ್ರದಾಯಿಕ ಮೀನುಗಾರರಿಗೆ ಮುಳುವಾಗಿ ಪರಿಣಮಿಸಿದೆ. ಇಲ್ಲಿ ಸಮುದ್ರ ವಿಹಾರಕ್ಕೆ ಬಂದವರಿಗೂ ನಡೆದಾಡಲು ಬಹಳ ಕಷ್ಟಕರವಾಗಿದೆ.

ಸರ್ಫಿಂಗ್ ಕಷ್ಟ: ಇದೇ ಜಾಗದಲ್ಲಿ ಸರ್ಫಿಂಗ್ ತರಬೇತಿ ನಡೆಯುತ್ತಿದೆ. ಇಲ್ಲಿಗೆ ದೇಶವಿದೇಶಗಳಿಂದ ಸರ್ಫಿಂಗ್ ಪ್ರಿಯರು ಆಗಮಿಸುತ್ತಾರೆ. ಆದರೆ ಇಲ್ಲಿನ ತ್ಯಾಜ್ಯಗಳನ್ನು ಕಂಡು ದಂಗಾಗಿದ್ದಾರೆ. ಬೇರೆ ಯಾವ ದೇಶದಲ್ಲೂ ಈ ರೀತಿಯ ತ್ಯಾಜ್ಯ ಸಂಗ್ರಹ ಇಲ್ಲ ಎಂದು ಹೇಳುತ್ತಾರೆ. ಹಲವು ವಿದೇಶೀಯರು ತಾವೇ ಸ್ವಯಂಸ್ಪೂರ್ತಿಯಿಂದ ಇಲ್ಲಿ ಕಸ ಸಂಗ್ರಹ ಮಾಡುತ್ತಿದ್ದಾರೆ.
ಹೊಳೆಗೆ ಮಾರಕ: ನೀರಿನಲ್ಲಿ ತೇಲುವ ತ್ಯಾಜ್ಯಗಳಷ್ಟೇ ಸಮುದ್ರ ತೀರದಲ್ಲಿ ರಾಶಿ ಬಿದ್ದಿದೆ. ಆದರೆ ನೀರಿನಲ್ಲಿ ತೇಲದೆ ನೀರಿನಡಿ ಸೇರುವ ಅದೆಷ್ಟೋ ವಿಷಕಾರಿ ತ್ಯಾಜ್ಯಗಳಿಂದ ಮೀನಿನ ಸಂತತಿ ನಾಶಕ್ಕೆ ಕಾರಣವಾಗಿದೆ ಎಂದು ಸ್ಥಳೀಯ ಸಾಂಪ್ರದಾಯಿಕ ಮೀನುಗಾರರು ಅವಲತ್ತುಕೊಂಡಿದ್ದಾರೆ. ಬಲು ರುಚಿಕರ ಎಂದು ಪ್ರಸಿದ್ದೀ ಪಡೆದ ಶಾಂಭವಿ ಹೊಳೆಯಲ್ಲಿ ಇತ್ತೀಚಿನ ವರ್ಷಗಳಲ್ಲಿ ಶೇ.70 ಕ್ಕಿಂತ ಅಧಿಕ ಮೀನಿನ ಉತ್ಪತ್ತಿ ಕಡಿಮೆಯಾಗಿದೆ ಎಂದವರು ಹೇಳಿಕೊಂಡಿದ್ದಾರೆ.

ಎಸ್‍ಎಲ್‍ಆರ್‍ಎಮ್ ಘಟಕ: ಇಲ್ಲಿ ಸರಕಾರದ ನಿರ್ದೇಶನದ ಎಸ್‍ಎಲ್‍ಆರ್‍ಎಮ್ ಘಟಕವೊಂದನ್ನು ಸ್ಥಾಪಿಸಿದರೆ ವರ್ಷಪೂರ್ತಿ ತ್ಯಾಜ್ಯ ವಿಲೇವಾರಿ ಮಾಡಿದರೂ ಮುಗಿಯದಷ್ಟು ಕಸ ಸಂಗ್ರಹವಾಗಿದೆ. ಜಿಲ್ಲಾಡಳಿತ ಈ ಬಗ್ಗೆ ಗಮನ ಹರಿಸಿ ಇಲ್ಲೊಂದು ಎಸ್‍ಎಲ್‍ಆರ್‍ಎಮ್ ಘಟಕ ಸ್ಥಾಪಿಸಿ ತ್ಯಾಜ್ಯ ವಿಲೇವಾರಿಗೆ ಮನ ಮಾಡಬೇಕೆಂದು ಸ್ಥಳೀಯರು ಆಗ್ರಹಿಸಿದ್ದಾರೆ.

ಅನಿಸಿಕೆ
-ಮಲ್ಪೆಯಲ್ಲಿಸಮುದ್ರ ತೀರದ ತ್ಯಾಜ್ಯ ವಿಲೇವಾರಿಗಾಗಿ ಅತ್ಯಾಧುನಿಕ ಯಂತ್ರ ಖರೀದಿಸಿಡಲಾಗಿದೆ. ಅದೀಗ ಉಪಯೋಗವಾಗುತ್ತಿಲ್ಲ. ಅದನ್ನು ಹೆಜಮಾಡಿ ಗ್ರಾಪಂಗೆ ಬಾಡಿಗೆಯಾಧಾರದಲ್ಲಿ ನೀಡಿದಲ್ಲಿ ಇಲ್ಲಿನ ಬೃಹತ್ ತ್ಯಾಜ್ಯಗಳನ್ನು ವಿಲೇವಾರಿ ಮಾಡಬಹುದಾಗಿದೆ. ಈ ಬಗ್ಗೆ ಜಿಲ್ಲಾಡಳಿತ ಸಹಕರಿಸಬೇಕು.
-ಸುಧಾಕರ ಕರ್ಕೇರ, ಉಪಾಧ್ಯಕ್ಷರು, ಹೆಜಮಾಡಿ ಗ್ರಾಪಂ.

  • ಹೆಜಮಾಡಿಯ ಅಳಿವೆ ಬಾಗಿಲಲ್ಲಿ ಬೃಹತ್‍ಮಟ್ಟದಲ್ಲಿ ವಿಷಕಾರಿ ತ್ಯಾಜ್ಯ ಸಂಗ್ರಹದ ಬಗ್ಗೆ ತಿಳಿದಿದೆ. ಈ ಬಗ್ಗೆ ಸ್ಥಳ ಸಮೀಕ್ಷೆ ನಡೆಸಿ ಉಡುಪಿ ಜಿಲ್ಲಾ ಕಾಲೇಜು ವಿದ್ಯಾರ್ಥಿಗಳ ಜತೆಗೆ ಪರಿಣಾಮಕಾರಿ ಕಾರ್ಯಕ್ರಮ ನಡೆಸಲಾಗುವುದು.
    -ವಿಲ್ಫ್ರೆಡ್ ಡಿಸೋಜಾ, ಜಿಲ್ಲಾ ಯುವ ಸಮಮನ್ವಯಾಧಿಕಾರಿ, ನೆಹರೂ ಯುವ ಕೇಂದ್ರ,
    -ಸರ್ಫಿಂಗ್‍ಗೆ ಹೇಳಿ ಮಾಡಿಸಿದಂತಹ ಪ್ರದೇಶವಿದು. ಪ್ರತಿ ವರ್ಷ ಮಳೆಗಾಲದ ಬಳಿಕ ಇಲ್ಲಿ ದೊಡ್ಡ ಮಟ್ಟದಲ್ಲಿ ವಿಷಕಾರಿ ತ್ಯಾಜ್ಯ ಸಂಗ್ರಹವಾಗುತ್ತಿದೆ. ನಮ್ಮ ಸರ್ಫಿಂಗ್ ಕ್ಲಬ್ ಮೂಲಕ ಪ್ರತೀ ತಿಂಗಳು ಇಲ್ಲಿ ಬೀಚ್ ಕ್ಲೀನ್ ಕಾರ್ಯಕ್ರಮ ಹಮ್ಮಿಕೊಳ್ಳುತ್ತಿದ್ದೇವೆ. ಆದರೆ ಎಲ್ಲಾ ತ್ಯಾಜ್ಯ ವಿಲೇವಾರಿ ಅಸಾಧ್ಯವಾಗಿದೆ.
    -ಸತ್ಯ ಶಮಂತ್ ಕುಮಾರ್, ನಿರ್ದೇಶಕ, ಸರ್ಫಿಂಗ್ ಸ್ವಾಮಿ ಫೌಂಡೇಶನ್, ಮೂಲ್ಕಿ.
    -ಹೆಜಮಾಡಿ ಬೀಚ್ ಕ್ಲೀನ್ ಉದ್ದೇಶದಿಂದ ಕರಾವಳಿ ಯುವಕ-ಯುವತಿ ವೃಂದ ನಿರಂತರ ಕಾರ್ಯಕ್ರಮ ಹಮ್ಮಿಕೊಳ್ಳುತ್ತಿದ್ದು, ಅಳಿವೆ ಭಾಗದಲ್ಲೂ ಸ್ವಚ್ಛ ಭಾರತ್ ಕಾರ್ಯಕ್ರಮ ಹಮ್ಮಿಕೊಳ್ಳಲಿದ್ದೇವೆ.
    -ಶರಣ್ ಕುಮಾರ್ ಮಟ್ಟು, ಕಾರ್ಯದರ್ಶಿ, ಕರಾವಳಿ ಯುವಕ-ಯುವತಿ ವೃಂದ,ಹೆಜಮಾಡಿ.
    ಸಮುದ್ರ ಸೇರಿದ್ದಕ್ಕಿಂತ ಅಧಿಕ ವಿಷಕಾರಿ ತ್ಯಾಜ್ಯಗಳು ಹೊಳೆಯ ನೀರಿನಡಿ ಸೇರಿಕೊಂಡಿದೆ. ಇಲ್ಲಿ ಬಲೆ ಹರಡಲೂ ಕಷ್ಟಕರವಾಗಿದ್ದು, ಮೀನಿನ ಸಂತತಿ ತೀರಾ ಕಡಿಮೆಯಾಗಿದೆ.
    -ಇಲಿಯಾಸ್, ಸ್ಥಳಿಯ ಮೀನುಗಾರ.