ಭೂ ಸುದಾರಣಾ ಮಸೂದೆಯ ಸಂತ್ರಸ್ತರಿಗೆ ಸುಂದರರಾಮ್ ಶೆಟ್ಟಿ ಆಸರೆಯಾಗಿದ್ದರು-ಡಾ.ಬಿ.ಎಮ್.ಹೆಗ್ಡೆ

ಮೂಲ್ಕಿ: ಉಳುವವನೇ ಹೊಲಡೊಡೆಯ ಭೂ ಸುಧಾರಣಾ ಮಸೂದೆ ಜಾರಿಗೊಂಡ ಸಂದರ್ಭ ಹಲವಾರು ಬಂಟ ಸಮಾಜದ ಕುಟುಂಬಗಳು ನಿರ್ಗತಿಕರಾಗಿದ್ದಾಗ ಅವರೆಲ್ಲರಿಗೆ ಬ್ಯಾಂಕ್ ಉದ್ಯೋಗ ಕೊಡಿಸಿ ಆಸರೆ ಕಲ್ಪಿಸಿದ ಮೂಲ್ಕಿ ಸುಂದರರಾಮ್ ಶೆಟ್ಟಿಯವರನ್ನು ಸದಾ ನೆನಪಿನಲ್ಲಿಡಬೇಕು ಎಂದು ಮಣಿಪಾಲದ ವಿಶ್ರಾಂತ ಉಪ ಕುಲಪತಿ ಡಾ.ಬಿ.ಎಂ.ಹೆಗ್ಡೆ ಹೇಳಿದರು.

ಮೂಲ್ಕಿ ಬಂಟರ ಸಂಘದ ಆಶ್ರಯದಲ್ಲಿ ಮೂಲ್ಕಿಯ ಕಾರ್ನಾಡು ಬಂಟರ ಸಭಾಭವನದಲ್ಲಿ ಸೋಮವಾರ ಸಂಘದ ವತಿಯಿಂದ ನಡೆದ 2019-20ನೇ ಸಾಲಿನ ವಿದ್ಯಾರ್ಥಿವೇತನ ವಿತರಣೆ, ಪ್ರತಿಭಾ ಪುರಸ್ಕಾರ, ಸಾಧಕರಿಗೆ ಸನ್ಮಾನ ಸಮಾರಂಭದಲ್ಲಿ ಬಂಟರ ಸಂಘದ ವತಿಯಿಂದ ನೀಡುವ ಮೂಲ್ಕಿ ಸುಂದರರಾಮ್ ಶೆಟ್ಟಿ ಪ್ರಶಸ್ತಿಯನ್ನು ಸ್ವೀಕರಿಸಿ ಅವರು ಮಾತನಾಡಿದರು.

ಸಮಾಜದಿಂದ ಪಡೆದ ಪುರಸ್ಕಾರವನ್ನು ಅತ್ಯಂತ ಸೌಜನ್ಯದಿಂದ ಸ್ವೀಕರಿಸುತ್ತಿದ್ದೇನೆ ಎಂದ ಅವರು, ಸುಂದರರಾಮ್ ಶೆಟ್ಟಿಯವರ ಜೀವನ ಕ್ರಮ ಯುವ ಜನಾಂಗಕ್ಕೆ ಅನುಕರಣೀಯವಾದುದು. ಬಂಟ ಸಮಾಜದ ಉನ್ನತಿಯಲ್ಲಿ ಅವರದ್ದು ಉನ್ನತ ಪಾತ್ರವಿದೆ ಎಂದರು.

ವಿಶ್ವ ಜಾಗತಿಕ ಬಂಟರ ಸಂಘಗಳ ಒಕ್ಕೂಟದ ಅಧ್ಯಕ್ಷ ಐಕಳ ಹರೀಶ್ ಶೆಟ್ಟಿ ಕಾರ್ಯಕ್ರಮವನ್ನು ಉದ್ಘಾಟಿಸಿ ಮಾತನಾಡಿ, ಸಮಾಜದ ಸಂಘಟನೆಗಳು ತ್ವರಿತವಾಗಿ ಸ್ಪಂದಿಸುವ ಗುಣವನ್ನು ಹೊಂದಿರಬೇಕು. ಸಮಾಜವನ್ನು ಕಟ್ಟಲು ಪ್ರಯತ್ನಿಸಿ ಬೆಂಬಲಿಸಿರಿ ಆದರೆ ಒಡೆಯಲು ಎಂದಿಗೂ ಮುಂದಾಗಬೇಡಿ ಎಂದರು.

ವಿದ್ಯಾರ್ಥಿ ವೇತನ ವಿತರಣೆ: ಈ ಸಂದರ್ಭದಲ್ಲಿ ವಿವಿಧ ಟ್ರಸ್ಟ್‍ಗಳಿಂದ 310 ವಿದ್ಯಾರ್ಥಿಗಳಿಗೆ ಸುಮಾರು 7 ಲಕ್ಷ ರೂ. ವಿದ್ಯಾ ನಿಧಿಯನ್ನು ನೀಡಲಾಯಿತು.

ಪ್ರತಿಭಾ ಪುರಸ್ಕಾರ: ಪ್ರತಿಭಾವಂತ ವಿದ್ಯಾರ್ಥಿಗಳಿಗೆ ಪ್ರತಿಭಾ ಪುರಸ್ಕಾರ ನಡೆಸಲಾಯಿತು.
ಸಾಧಕರಿಗೆ ಸನ್ಮಾನ: ವಿವಿಧ ಕ್ಷೇತ್ರಗಳಲ್ಲಿ ಸಾಧನೆಗೈದ ಐಕಳದ ಹರೀಶ್ ಶೆಟ್ಟಿ, ಚಂದ್ರಿಕಾ ಶೆಟ್ಟಿ, ಉಪೇಂದ್ರ ಶೆಟ್ಟಿ ಬೆಂಗಳೂರು, ಪಾದೆಮನೆ ಅಜಿತ್ ರೈ, ಡಾ.ಇಂದಿರಾ ಹೆಗ್ಡೆ, ಚಿತ್ತರಂಜನ್ ಶೆಟ್ಟಿ ಉಳೆಪಾಡಿ, ನಿಶಾಂತ್ ಶೆಟ್ಟಿ ಕಿಲೆಂಜೂರು, ಶ್ರೀಶ ಸರಾಫ್ ಐಕಳ, ಹರ್ಷರಾಜ್ ಶೆಟ್ಟಿ ಜಿ.ಎಂ., ಸುಭಾಸ್ ಶೆಟ್ಟಿ ಅವರನ್ನು ಸನ್ಮಾನಿಸಲಾಯಿತು.

ಮೂಲ್ಕಿ ಬಂಟರ ಸಂಘದ ಆಧ್ಯಕ್ಷ ಸಂತೋಷ್‍ಕುಮಾರ್ ಹೆಗ್ಡೆ ಸಮಾರಂಭದ ಅಧ್ಯಕ್ಷತೆಯನ್ನು ವಹಿಸಿ ಶುಭ ಹಾರೈಸಿದರು.
ಬೆಂಗಳೂರು ಬಂಟರ ಸಂಘದ ಅಧ್ಯಕ್ಷ ಉಪೇಂದ್ರ ಅರ್. ಶೆಟ್ಟಿ, ಟ್ರಸ್ಟಿ ಶ್ರೀಧರ ಶೆಟ್ಟಿ, ಸಂಘದ ಉಪಾಧ್ಯಕ್ಷ ಪುರುಷೋತ್ತಮ ಶೆಟ್ಟಿ, ಜತೆ ಕಾರ್ಯದರ್ಶಿ ಮಲ್ಲಿಕಾ ಪೂಂಜಾ, ಯುವ ಮತ್ತು ಕ್ರೀಡಾ ವಿಭಾಗದ ಸಂಚಾಲಕ ರಾಜೇಶ್‍ಕುಮಾರ್ ಶೆಟ್ಟಿ, ಮಹಿಳಾ ವಿಭಾಗದ ಸಂಚಾಲಕಿ ಗೀತಾ ಜೆ. ಹೆಗ್ಡೆ, ಪತ್ರಿಕಾ ಮತ್ತು ಪ್ರಚಾರ ವಿಭಾಗದ ಸಂಚಾಲಕ ನಿಶಾಂತ್ ಶೆಟ್ಟಿ ಕಿಲೆಂಜೂರು, ನವೀನ್‍ಕುಮಾರ್ ಶೆಟ್ಟಿ ಎಡ್ಮೆಮಾರ್, ಶರತ್ ಶೆಟ್ಟಿ ಉಪಸ್ಥಿತದ್ದರು.

ಸಂಘದ ಕಾರ್ಯದರ್ಶಿ ಕೆ.ರವಿರಾಜ ಶೆಟ್ಟಿ ಪ್ರಸ್ತಾವಿಸಿ ಸ್ವಾಗತಿಸಿದರು. ಸಾಯಿನಾಥ್ ಶೆಟ್ಟಿ ಮುಂಡ್ಕೂರು ಕಾರ್ಯಕ್ರಮ ನಿರ್ವಹಿಸಿದರು. ಕೋಶಾಧಿಕಾರಿ ಅಶೋಕ್‍ಕುಮಾರ್ ಶೆಟ್ಟಿ ವಂದಿಸಿದರು.