ಹೆಜಮಾಡಿ ಮುಟ್ಟಳವೆ ಸುತ್ತ ಸತ್ತ ಮೀನುಗಳ ರಾಶಿ: ಕಾಮಿನಿ ಹೊಳೆಯಾದ್ಯಂತ ಕೊಳೆತ ಮೀನುಗಳು: ನೀರಿನಲ್ಲಿ ರಾಸಾಯನಿಕ ಶಂಕೆ

ಪಡುಬಿದ್ರಿ: ಮಳೆಗಾಲ ಬಿರುಸುಗೊಳ್ಳುತ್ತಿದ್ದಂತೆ ಹೆಜಮಾಡಿ ಮತ್ತು ಪಡುಬಿದ್ರಿಯನ್ನು ಕಡಲ ತೀರದಲ್ಲಿ ಸಂಪರ್ಕಿಸುವ ಮುಟ್ಟಳಿವೆಯನ್ನು ಶನಿವಾರ ರಾತ್ರಿ ಕಡಿದಿದ್ದು, ಭಾನುವಾರ ಮುಂಜಾನೆ ಕಾಮಿನಿ ಹೊಳೆಯಾದ್ಯಂತ ಹಾಗೂ ಪಡುಬಿದ್ರಿ, ಹೆಜಮಾಡಿ ಕಡಲ ತಡಿಯಲ್ಲಿ ಸತ್ತ ಮೀನುಗಳ ರಾಶಿ ಕಂಡುಬಂದಿದೆ. ಸತ್ತು ದುರ್ವಾಸನೆ ಬೀರುವ ಮೀನುಗಳನ್ನು ಕಂಡ ಮೀನುಗಾರರು ಕಾಮಿನಿ ಹೊಳೆಯಲ್ಲಿ ಯಾವುದೇ ವಿಷಕಾರಿ ರಾಸಾಯನಿಕ ಅಂಶ ಸೇರಿಕೊಂಡಿರುವ ಕಾರಣ ಲಕ್ಷಾಂತರ ಮೀನುಗಳು ಸತ್ತಿರಬೇಕೆಂದು ಶಂಕಿಸಿದ್ದಾರೆ.

ಮುದರಂಗಡಿ, ಎಲ್ಲೂರು ಕಡೆಯಿಂದ ಆರಂಭಗೊಂಡು ಹೆಜಮಾಡಿ ಮತ್ತು ಪಡುಬಿದ್ರಿಯನ್ನು ಸಂಪರ್ಕಿಸುವ ಬ್ಲೂ ಫ್ಲ್ಯಾಗ್ ಬೀಚ್ ಬಳಿಯ ಮುಟ್ಟಳಿವೆಯಾದ್ಯಂತ ಭಾನುವಾರ ಮುಂಜಾನೆಯಿಂದಲೇ ಸತ್ತ ಮೀನುಗಳು ಕಂಡುಬಂದಿದ್ದು ಮೀನುಗಾರರಲ್ಲಿ ಆತಂಕ ಮೂಡಿಸಿದೆ.

ಎಲ್ಲೂರಿನಲ್ಲಿ ಕಾರ್ಯಾಚರಿಸುತ್ತಿರುವ ಅದಾನಿ-ಯುಪಿಸಿಎಲ್ ಉಷ್ಣ ವಿದ್ಯುತ್ ಸ್ಥಾವರದ ರಾಸಾಯನಿಕ ಹೊಳೆಗೆ ಸೇರಿದ ಕಾರಣವೇ ಮೀನುಗಳ ಮಾರಣ ಹೋಮ ನಡೆದಿದೆ ಎಂದು ಸ್ಥಳೀಯ ಮೀನುಗಾರರು ಅವಲತ್ತುಕೊಂಡಿದ್ದಾರೆ.
ಮೀನುಗಳ ಸ್ವರ್ಗ : ಮುಟ್ಟಳಿವೆ ಕಡಿತದ ದಿನದಂದು ಇಲ್ಲಿ ಬಲೆ ಹಿಡಿದು ಬರುವ ಮೀನುಗಾರರಿಗೆ ಬೇಕಾದಷ್ಟು ಮೀನುಗಳು ದೊರೆಯುತ್ತದೆ. ಅದಕ್ಕಾಗಿ ಮುಟ್ಟಳವಿ ಕಡಿದ ದಿನ ನೂರಾರು ಮೀನುಗಾರರು ಇಲ್ಲಿಗೆ ಆಗಮಿಸಿ ವಿವಿಧ ರೀತಿಯ ಬಲೆಗಳನ್ನು ಹರಡಿ ಮೀನು ಹಿಡಿಯುತ್ತಾರೆ. ಶನಿವಾರ ರಾತ್ರಿ ಮತ್ತು ಭಾನುವಾರ ಮುಂಜಾನೆ ಸಾಕಷ್ಟು ಮೀನುಗಳನ್ನು ಹಿಡಿಯಲಾಗಿತ್ತು.ಪ್ರತಿ ವರ್ಷ ಮಳೆಗಾಲ ಮುಗಿದ ಬಳಿಕ ಮುಟ್ಟಳಿವೆ ಸಮುದ್ರ ಮತ್ತು ಕಾಮಿನಿ ಹೊಳೆಯನ್ನು ಬೇರ್ಪಡಿಸುತ್ತದೆ. ಆ ಸಂದರ್ಭ ಕಾಮಿನಿ ಹೊಳೆಯಲ್ಲಿ ಕೋಟ್ಯಂತರ ಮೀನುಗಳು ಉತ್ಪತ್ತಿಯಾಗಿ ಮುಂದಿನ ಮಳೆಗಾಲದ ಆರಂಭದಲ್ಲಿ ಸಮುದ್ರ ಸೇರುವ ಕಾರಣ ಮುಟ್ಟಳಿವೆ ಬಳಿ ಮೀನುಗಾರರಿಗೆ ಹೇರಳ ಮೀನುಗಳು ಲಭ್ಯವಾಗುತ್ತದೆ.

ಆದರೆ ಈ ಬಾರಿ ಮೀನುಗಳ ಮಾರಣಹೋಮದಿಂದ ಮೀನುಗಾರರಿಗೆ ನಿರಾಸೆಯಾಗಿದೆ.
ಭಾನುವಾರ ಪ್ರವಾಸಿಗರ ಭೇಟಿ: ಮುಟ್ಟಳಿವೆಯಲ್ಲಿ ಸಹಸ್ರಾರು ಸಂಖ್ಯೆಯಲ್ಲಿ ಬೆಲೆಬಾಳುವ ಮೀನುಗಳು ಸತ್ತುಬಿದ್ದಿರುವುದನ್ನು ಸಾಮಾಜಿಕ ಜಾಲತಾಣಗಳ ಮೂಲಕ ತಿಳಿದ ಸಹಸ್ರಾರು ಕುತೂಹಲಿಗರು ಮುಟ್ಟಳಿವೆಗೆ ದೌಡಾಯಿಸಿದ್ದಾರೆ. ಇಲ್ಲಿ ಹೇರಳ ಮೀನುಗಳು ಸತ್ತುಬಿದ್ದಿರುವುದನ್ನು ಕಂಡು ಹೌಹಾರಿದ್ದಾರೆ. ಇದರ ನಡುವೆ ಅರೆಜೀವದಲ್ಲಿದ್ದ ಮೀನುಗಳನ್ನು ಹೆಕ್ಕಿ ಮನೆಗೆ ಕೊಂಡೊಯ್ದಿದ್ದಾರೆ.
ನೀರು ಕಲುಷಿತ: ಮುಟ್ಟಳಿವೆ ಬಳಿ ಕಾಮಿನಿ ಹೊಳೆಯಿಂದ ಬಂದ ನೀರು ಶೇಖರಣೆಗೊಂಡಿದ್ದು ಕಪ್ಪುವರ್ಣಕ್ಕೆ ತಿರುಗಿದೆ. ಮುಟ್ಟಳಿವೆಯ ದಕ್ಷಿಣ ಭಾಗದಲ್ಲಿ ಶೇಖರಣೆಗೊಂಡ ಕಪ್ಪುವರ್ಣದ ನೀರಿನಲ್ಲಿ ಲಕದಷಾಂತರ ಮೀನುಗಳು ಸತ್ತುಬಿದ್ದಿದ್ದು, ಅದರ ನಡುವೆ ಜೀವಂತ ಮೀನುಗಳನ್ನು ಹೆಕ್ಕಿದ್ದಾರೆ.ಈ ನೀರು ದುರ್ವಾಸನೆಯನ್ನೂ ಹೊಂದಿದೆ.

ಮುಟ್ಟಳಿವೆ ಕಡಿತಗೊಂಡ ಬಳಿಕ ಇಲ್ಲಿ ವಾರದ ತನಕ ಮೀನುಗಳು ಹೇರಳವಾಗಿ ದೊರಕುವುದು ರೂಢಿ. ಆದರೆ ಮೀನುಗಳು ಸತ್ತುಬಿದ್ದ ಕಾರಣ ಈ ಬಾರಿ ತಮಗೆ ನಿರಾಸೆಯಾಗಿದೆ ಎಂದು ಸ್ಥಳೀಯ ಮೀನುಗಾರರು ಅವಲತ್ತುಕೊಂಡಿದ್ದಾರೆ.
ಯುಪಿಸಿಎಲ್ ಸ್ಥಾವರದ ಕಲ್ಲಿದ್ದಲು ರಾಶಿಯ ಮೇಲೆ ಬಿದ್ದ ಮಳೆ ನೀರು ಕಾಮಿನಿ ಹೊಳೆ ಸೇರಿದ ಕಾರಣವೇ ಮೀನುಗಳ ಮಾರಣ ಹೋಮ ನಡೆದಿದೆ ಎಂದು ಸ್ಥಳೀಯ ಮೀನುಗಾರರದ ಅಳಲು. ಸ್ಥಾವರದಲ್ಲಿ ಸಮುದ್ರದಿಂದ ಪಡೆಯುವ ನೀರನ್ನು ಬಳಸಿದ ಬಳಿಕ ಸಂಸ್ಕರಿಸಿ ಮರಳಿ ಸಮುದ್ರಕ್ಕೆ ಬಿಡಲಾಗುತ್ತದೆ. ಅದರೆ ಸ್ಥಾವರದಲ್ಲಿ ರಾಶಿ ಹಾಕಿಡಲಾದ ಕಲ್ಲಿದ್ದಲಿಗೆ ಮಳೆ ನೀರು ಬೀಳದಂತೆ ಯಾವುದೇ ತಡೆ ಇಲ್ಲ. ಹಾಗಾಗಿಯೇ ಅದಕ್ಕೆ ಬಿದ್ದ ಮಳೆ ನೀರು ನೇರ ಕಾಮಿನಿ ಹೊಳೆಗೆ ಬಂದಿದ್ದು, ಮೀನುಗಳು ಸಾವನ್ನಪ್ಪಿವೆ ಎಂದು ಮೀನುಗಾರರು ಹೇಳಿದ್ದಾರೆ.ಕಳೆದ 10 ತಿಂಗಳಿಂದ ಕಾಮಿನಿ ಹೊಳೆಯ ನೀರು ನಿಂತ ನೀರಾಗಿದ್ದು, ಈ ಸಂದರ್ಭ ಲಕ್ಷಾಂತರ ಮೀನುಗಳು ಸಂಗ್ರಹಗೊಂಡಿತ್ತು.ಒಮ್ಮೆಲೆ ಮಳೆ ಬಂದ ಕಾರಣ ನೀರಿನ ಆಮ್ಲಜನಕದಲ್ಲಿ ಅಥವಾ ಉಪ್ಪಿನಾಂಶದಲ್ಲಿ ಆದ ವ್ಯತ್ಯಯದಿಂದಲೂ ಮೀನುಗಳು ಸತ್ತಿರುವ ಸಾಧ್ಯತೆ ಅಲ್ಲಗಳೆಯುವಂತಿಲ್ಲ.

ಅನಿಸಿಕೆ

-ಈ ಬಾರಿ ಮಳೆ ತಡವಾಗಿ ಬಂದ ಕಾರಣ ಹೊಳೆ ಮೀನು ಸಮುದ್ರ ಸೇರುವ ಸಂದರ್ಭ ಉಪ್ಪಿನಾಂಶ ಅತಿಯಾಗಿ ಈ ರೀತಿ ಆಗಿರಬಹುದು. ಹೊಳೆಯಲ್ಲಿ ನೀರು ಕಲುಷಿತಗೊಂಡಿದ್ದು ಇದರಿಂದಲೂ ಮೀನುಗಳು ಸತ್ತಿರುವ ಸಾಧ್ಯತೆ ಇದೆ. ಆದಾಗ್ಯೂ ಸಂಸ್ಥೆಯ ವಿಜ್ಞಾನಿಗಳು ಸ್ಥಳ ಪರಿಶೀಲನೆ ನಡೆಸಿದ ಬಳಿಕವಷ್ಟೇ ಸರಿಯಾದ ಕಾರಣ ತಿಳಿಯಲಿದೆ.

  • ಡಾ.ಪ್ರತಿಭಾ ರೋಹಿತ್, ಮುಖ್ಯ ವಿಜ್ಞಾನಿ, ಕೇಂದ್ರೀಯ ಸಾಗರ ಮೀನುಗಾರಿಕಾ ಸಂಶೋಧನಾ ಕೇಂದ್ರ,ಮಂಗಳೂರು.
    ನೀರಿನಲ್ಲಿನ ಉಪ್ಪಿನಾಂಶದ ವ್ಯತ್ಯಯದಿಂದ ಹೀಗಾಗಲು ಸಾಧ್ಯವಿದೆ. ನೀರು ಕಲುಷಿತಗೊಂಡದ್ದು ಕಂಡುಬಂದಿದೆ. ವಿಷಕಾರಿ ರಾಸಾಯನಿಕ ಸೇರ್ಪಡೆಯಿಂದಲೂ ಮೀನುಗಳು ಸಾಯುವ ಸಾದ್ಯತೆ ಇದೆ. ಈ ಬಗ್ಗೆ ಮಾಲಿನ್ಯ ನಿಯಂತ್ರಣ ಮಂಡಳಿ ಅಥವಾ ಕಾಲೇಜಿನವರು ಪರಿಶೀಲನೆ ನಡೆಸುವ ಅಗತ್ಯವಿದೆ. ಸೋಮವಾರ ಮೀನುಗಾರಿಕಾ ಇಲಾಖಾಧಿಕಾರಿಗಳು ಭೇಟಿ ನೀಡಿ ಪರಿಶೀಲಿಸಲಿದ್ದಾರೆ.
    -ಪಾಶ್ರ್ವನಾಥ್, ಉಪ ನಿರ್ದೇಶಕರು, ಮೀನುಗಾರಿಕಾ ಇಲಾಖೆ, ಉಡುಪಿ.