ಹೆಜಮಾಡಿಯಲ್ಲಿ ರಾಜ್ಯಮಟ್ಟದ ಕ್ರಿಕೆಟ್ ಪಂದ್ಯಾಟ ದುರ್ಗಾ ಪ್ರೀಮಿಯರ್ ಲೀಗ್ ಉದ್ಘಾಟನೆ

25ನೇ ವಯಸ್ಸಿನವರೆಗೆ ಶ್ರಮಪಟ್ಟರೆ ಮುಂದೆ 75 ವರ್ಷ ಜೀವನ ಸುಖಾನುಭವ-ಐವನ್ ಡಿಸೋಜಾ
ಹೆಜಮಾಡಿಯಲ್ಲಿ ರಾಜ್ಯಮಟ್ಟದ ಕ್ರಿಕೆಟ್ ಪಂದ್ಯಾಟ ದುರ್ಗಾ ಪ್ರೀಮಿಯರ್ ಲೀಗ್ ಉದ್ಘಾಟನೆ

ಪಡುಬಿದ್ರಿ: ತಮ್ಮ 25ನೇ ವಯಸ್ಸಿನವರೆಗೆ ಶ್ರಮಪಟ್ಟು ಸಾಧನೆಗೈದರೆ ಮುಂದಿನ 75 ವರ್ಷ ಜೀವನವನ್ನು ಎಂಜಾಯ್ ಮಾಡಬಹುದು.ಸಾಧಕರಾಗಲು ಅಡ್ಡದಾರಿ ಉತ್ತಮವಲ್ಲ.ಅದನ್ನು ಬಿಟ್ಟುಬಿಡಬೇಕು.ಪರಿಶ್ರಮದ ಮೂಲಕ ಸಾಧಕರಾಗಬೇಕು ಎಂದು ರಾಜ್ಯ ಮುಖ್ಯ ಸಚೇತಕ ಐವನ್ ಡಿಸೋಜಾ ಹೇಳಿದರು.

ಹೆಜಮಾಡಿ ಬಸ್ತಿಪಡ್ಪು ಕ್ರೀಡಾಂಗಣದಲ್ಲಿ ಹೆಜಮಾಡಿಯ ದುರ್ಗಾ ಫ್ರೆಂಡ್ಸ್ ಆಶ್ರಯದಲ್ಲಿ ಶುಕ್ರವಾರ ಆರಂಭಗೊಂಡ ರಾಜ್ಯಮಟ್ಟದ ಕ್ರಿಕೆಟ್ ಪಂದ್ಯಾಟ ದುರ್ಗಾ ಪ್ರೀಮಿಯರ್ ಲೀಗ್ 2ಕೆ 19ನ್ನು ಉದ್ಘಾಟಿಸಿ ಅವರು ಮಾತನಾಡಿದರು.

ಹೆಜಮಾಡಿಯ ಗ್ರಾಪಂ ಕಟ್ಟಡ ನಿರ್ಮಾಣಕ್ಕೆ ತನ್ನ ವತಿಯಿಂದ 5 ಲಕ್ಷ ರೂ.ನೀಡುವುದಾಗಿ ಘೋಷಿಸಿದ ಅವರು ಮತ್ತಷ್ಟು ಅನುದಾನ ನೀಡುವ ಭರವಸೆ ನೀಡಿದರು.ಹೆಜಮಾಡಿ ಕ್ರೀಡಾಂಗಣದಲ್ಲಿ ಮತ್ತೊಂದು ಪೆವಿಲಿಯನ್ ನಿರ್ಮಿಸುವುದಾದಲ್ಲಿ ತಾನು ಅನುದಾನ ನೀಡುವುದಾಗಿಯೂ ಅವರು ಘೋಷಿಸಿದರು.

ಸಮಾರಂಭದ ಅಧ್ಯಕ್ಷತೆ ವಹಿಸಿದ್ದ ಶಾಸಕ ಲಾಲಾಜಿ ಆರ್.ಮೆಂಡನ್ ಮಾತನಾಡಿ,ಚುಟುಕು ಕ್ರಿಕೆಟ್ ಪಂದ್ಯಾಟಗಳ ಬದಲು ನೈಜ ಕ್ರಿಕೆಟ್‍ಗೆ ಹೆಚ್ಚು ಒತ್ತು ನೀಡಬೇಕು.ಈ ಮೂಲಕ ಎಳೆಯರು ಪ್ರವರ್ಧಮಾನಕ್ಕೆ ಬರಲು ಸಾಧ್ಯವಿದೆ.ಹೆಜಮಾಡಿಯ ಕ್ರೀಡಾಂಗಣವನ್ನು ಸಾರ್ವಕಾಲಿಕ ಕ್ರೀಡಾಂಗಣವನ್ನಾಗಿಸಲು ಕಾರ್ಯಸೂಚಿ ಹಮ್ಮಿಕೊಳ್ಳಲಾಗಿದ್ದು,ಇದರಿಂದ ಕ್ರೀಡಾಳುಗಳಿಗೆ ಸಹಾಯವಾಗಲಿದೆ ಎಂದರು.

ಉಡುಪಿ ಜಿಲ್ಲಾ ಟೆನ್ನಿಸ್‍ಬಾಲ್ ಕ್ರಿಕೆಟ್ ಅಸೋಸಿಯೇಶನ್ ಅಧ್ಯಕ್ಷ ಶರತ್ ಶೆಟ್ಟಿ ಮಾತನಾಡಿ,ಎಳೆಯರು ತಂಡದ ನಿರ್ಧಾರಗಳಿಗೆ ಬದ್ಧವಾಗಿದ್ದಕೊಂಡು ಆಟವಾಡಬೇಕು.ಇದರಿಂದ ತಂಡಕ್ಕೆ ಮತ್ತು ವೈಯಕ್ತಿಕ ಲಾಭವಾಗಲಿದೆ.ಶಿಸ್ತುಬದ್ಧ ಕ್ರಿಕೆಟ್‍ನಿಂದ ಮುಂದೆ ಜೀವನದಲ್ಲೂ ಯಶಸ್ಸು ಗಳಿಸಲು ಸಾಧ್ಯವಿದೆ ಎಂದರು.

ಶ್ರೀ ಮಂಗಳಾ ಎಂಟರ್‍ಪ್ರೈಸಸ್ ಮಾಲಕ ಸೂರಜ್ ಶೆಟ್ಟಿ,ಜಿಪಂ ಸಾಮಾಜಿಕ ನ್ಯಾಯ ಸ್ಥಾಯೀ ಸಮಿತಿಯ ಅಧ್ಯಕ್ಷ ಶಶಿಕಾಂತ್ ಪಡುಬಿದ್ರಿ,ಹೆಜಮಾಡಿ ಶ್ರೀ ಮಹಾಲಿಂಗೇಶ್ವರ ದೇವಳದ ಆಡಳಿತ ಮೊಕ್ತೇಸರ ದಯಾನಂದ ಹೆಜ್ಮಾಡಿ,ಪಠೇಲರ ಮನೆ ಶಂಕರ ಶೆಟ್ಟಿ,ಗ್ರಾಪಂ ಅಧ್ಯಕ್ಷೆ ವಿಶಾಲಾಕ್ಷಿ ಪುತ್ರನ್,ಪಠೇಲರ ಮನೆ ಚಂದ್ರಹಾಸ ಶೆಟ್ಟಿ,ತಾಪಂ ಸದಸ್ಯೆ ರೇಣುಕಾ ಪುತ್ರನ್,ಪಠೇಲರ ಮನೆ ಪುಷ್ಪರಾಜ್ ಶೆಟ್ಟಿ,ಬಿಜೆಪಿ ಸ್ಥಾನೀಯ ಸಮಿತಿ ಅಧ್ಯಕ್ಷ ಪಾಂಡುರಂಗ ಕರ್ಕೇರ,ಕಾಂಗ್ರೆಸ್ ಸ್ಥಾನೀಯ ಸಮಿತಿ ಅಧ್ಯಕ್ಷ ಸುಧೀರ್ ಕರ್ಕೇರ,ದುರ್ಗಾ ಫ್ರೆಂಡ್ಸ್ ಅಧ್ಯಕ್ಷ ಎಚ್.ರವಿ ಕುಂದರ್ ಮುಖ್ಯ ಅತಿಥಿಗಳಾಗಿದ್ದರು.
ಹೆಜಮಾಡಿ ಗ್ರಾಪಂ ಉಪಾಧ್ಯಕ್ಷ ಸುಧಾಕರ ಕರ್ಕೇರ ಪ್ರಸ್ತಾವಿಸಿದರು.ವಿನಯಕುಮಾರ್ ಸ್ವಾಗತಿಸಿ ಕಾರ್ಯಕ್ರಮ ನಿರ್ವಹಿಸಿದರು.

ಪಂದ್ಯಾಟದಲ್ಲಿ ಒಟ್ಟು ಎಂಟು ತಂಡಗಳು ಭಾಗವಹಿಸುತ್ತಿದ್ದು,ಎರಡು ವಿಭಾಗಗಳಾಗಿ ಲೀಗ್ ಮಾದರಿಯಲ್ಲಿ ಮೂರು ದಿನಗಳ ಕಾಲ ಆಟವಾಡಲಿದೆ.