ಮೂಲ್ಕಿ ನಪಂ ಚುನಾವಣೆ: ಕಾಂಗ್ರೆಸ್- ಜೆಡಿಎಸ್ ಮೈತ್ರಿ ಕೂಟಕ್ಕೆ ಜನಾದೇಶ

ಕಾಂಗ್ರೆಸ್-9,ಬಿಜೆಪಿ-8,ಜೆಡಿಎಸ್-1 ಸ್ಥಾನ ಗಳಿಕೆಸಂಸದರು,ಶಾಸಕರ ಮತ ಸೇರ್ಪಡೆಯಿಂದ ಟೈ: ಅಧ್ಯಕ್ಷ- ಉಪಾಧ್ಯಕ್ಷ ಸ್ಥಾನಕ್ಕೆ ಟಾಸ್ ಸಾಧ್ಯತೆ

ಮೂಲ್ಕಿ: ಲೋಕಸಭಾ ಚುನಾವಣಾ ಫಲಿತಾಂಶದ ಬಳಿಕ ನಡೆದ ಮೂಲ್ಕಿ ನಗರ ಪಂಚಾಯಿತಿ ಚುನಾವಣೆಯಲ್ಲಿ ಆಡಳಿತಾರೂಢ ಬಿಜೆಪಿಯನ್ನು ಹಿಂದಿಕ್ಕಿ ಕಾಂಗ್ರೆಸ್-ಜೆಡಿಎಸ್ ಮೈತ್ರಿ ಕೂಟವು ಜನಾದೇಶ ಪಡೆದಿದೆ.

18 ಸ್ಥಾನಗಳಿಗಾಗಿ ನಡೆದ ಚುನಾವಣೆಯ ಮತ ಎಣಿಕೆಯಲ್ಲಿ ಕಾಂಗ್ರೆಸ್-9, ಬಿಜೆಪಿ-8 ಮತ್ತು ಜೆಡಿಎಸ್-1 ಸ್ಥಾನ ಗಳಿಸಿದ್ದು, ಕಾಂಗ್ರೆಸ್-ಜೆಡಿಎಸ್ ಚುನಾವಣಾ ಪೂರ್ವ ಮೈತ್ರಿ ಮಾಡಿದ್ದರಿಂದ 10-8 ಸ್ಥಾನಗಳ ಜನಾದೇಶ ಗಳಿಸಿದೆ.ಆದರೆ ಆಡಳಿತ ನಡೆಸುವ ಸಂದರ್ಭ ಅಧ್ಯಕ್ಷ- ಉಪಾಧ್ಯಕ್ಷ ಸ್ಥಾನಗಳಿಗಾಗಿ ನಡೆಯುವ ಚುನಾವಣೆಯಲ್ಲಿ ಸ್ಥಳೀಯ ಸಂಸದರು ಮತ್ತು ಶಾಸಕರಿಗೆ ಮತಾವಕಾಶ ಇರುವುದರಿಂದ 10-10 ಸ್ಥಾನಗಳ ಮೂಲಕ ಟಾಸ್ ಮೂಲಕ ಆಯ್ಕೆ ಪ್ರಕ್ರಿಯೆ ನಡೆಸಬೇಕಾದ ಅನಿವಾರ್ಯತೆ ಮೂಡಿಬಂದಿದೆ.

ಇತ್ತೀಚಿನ ಲೋಕಸಭಾ ಚುನಾವಣೆಯಲ್ಲಿ ಮೂಲ್ಕಿ ನಗರ ವ್ಯಾಪ್ತಿಯಲ್ಲಿ ಬಿಜೆಪಿಗೆ ಅತೀ ಹೆಚ್ಚು ಮತ ದೊರಕಿತ್ತು.ಇದೇ ಆಧಾರದಲ್ಲಿ ಬಿಜೆಪಿ ಅಧಿಕ ಸ್ಥಾನ ಗಳಿಸುವ ಉತ್ಸಾಹದಲ್ಲಿದ್ದರು.ಆದರೆ ಕಾಂಗ್ರೆಸ್-ಜೆಡಿಎಸ್ ಮೈತ್ರಿ ಪಕ್ಷವು ಅಭಿವೃದ್ಧಿ ಕಾರ್ಯದೊಂದಿಗೆ ಅಭ್ಯರ್ಥಿಗಳ ವೈಯಕ್ತಿಕ ವರ್ಚಸ್ಸುಗಳನ್ನು ಮತದಾರರಿಗೆ ತಲುಪಿಸುವ ಮೂಲಕ ಬಿಜೆಪಿ ಆಸೆಗೆ ತಣ್ಣೀರೆರಚಿದೆ.

4ನೇ ವಾರ್ಡ್‍ನಲ್ಲಿ ಬಿಜೆಪಿಯ ವಂದನಾ ಕಾಮತ್ ಅತೀ ಹೆಚ್ಚು ಅಂತರ(348)ದಿಂದ ಕಾಂಗ್ರೆಸ್ ಬೆಂಬಲಿತೆ ಸ್ವತಂತ್ರ ಅಭ್ಯರ್ಥಿ ಸಂಗೀತಾ ಸನಿಲ್‍ರನ್ನು ಸೋಲಿಸಿದರೆ, 8ನೇ ವಾರ್ಡ್‍ನಲ್ಲಿ ತುರುಸಿನ ಸ್ಪರ್ಧೆಯಲ್ಲಿ ಕಾಂಗ್ರೆಸ್‍ನ ಯೋಗೀಶ್ ಕೋಟ್ಯಾನ್‍ರವರು ಕಾಂಗ್ರೆಸ್ ಬಂಡಾಯ ಸ್ವತಂತ್ರ ಅಭ್ಯರ್ಥಿ ಸಂದೀಪ್ ಚಿತ್ರಾಪು ವಿರುದ್ಧ ಕೇವಲ 5 ಮತಗಳ ಅಂತರದಿಂದ ವಿಜಯಿಯಾದರು.ಇಲ್ಲಿ ಬಿಜೆಪಿಯೂ ಅಧಿಕ(200) ಮತ ಗಳಿಸಿದ್ದು, ವಿಜಯೀ ಅಭ್ಯರ್ಥಿಗಿಂತ 33 ಮತ ಕಡಿಮೆ ಗಳಿಸಿತ್ತು.
ಬಿಜೆಪಿ ನಗರಾಧ್ಯಕ್ಷ ಸತ್ಯೇಂದ್ರ ಶೆಣೈ ಕಾಂಗ್ರೆಸ್‍ನ ಯುವ ಅಭ್ಯರ್ಥಿ ಬಾಲಚಂದ್ರ ಕಾಮತ್ ಎದುರು ಸೋಲುವ ಮೂಲಕ ಬಿಜೆಪಿಗೆ ಮುಜುಗರ ತಂದಿದ್ದಾರೆ.

ಜೆಡಿಎಸ್ ಖಚಿತವಾಗಿ ಗೆಲ್ಲಲಿದೆ ಎಂದು ಭಾವಿಸಿದ್ದ 10ನೇ ವಾರ್ಡ್‍ನಲ್ಲಿ ಬಿಜೆಪಿ 6 ಮತಗಳ ಅಂತರದ ಪ್ರಯಾದದ ಜಯ ದಾಖಲಿಸಿದೆ. ನಪಂ ಉಪಾಧ್ಯಕ್ಷೆ ರಾಧಿಕಾ ಕೋಟ್ಯಾನ್ ನಿರೀಕ್ಷೆಯಂತೆ 267 ಮತಗಳ ಅಂತರದಿಂದ ಜಯ ಗಳಿಸಿದ್ದಾರೆ.ಹಲವು ಸಮಯದ ಬಳಿಕ ಜೆಡಿಎಸ್ ಖಾತೆ ತೆರೆದಿರುವುದು ಕಾರ್ಯಕರ್ತರಲ್ಲಿ ಹರ್ಷ ಮೂಡಿಸಿದೆ.

ಕಾಂಗ್ರೆಸ್‍ನ ವಿಮಲಾ ಪೂಜಾರಿ ಮತ್ತು ಪುತ್ತುಬಾವರವರು ಸತತ 3 ಬಾರಿ ವಿಜಯ ಗಳಿಸುವ ಮೂಲಕ ನಪಂನ ಹಿರಿಯ ಸದಸ್ಯರಾಗಿ ಮೂಡಿ ಬಂದಿದ್ದಾರೆ.ಕಾಂಗ್ರೆಸ್‍ನಿಂದ ಅಧ್ಯಕ್ಷ ಸ್ಥಾನಕ್ಕೆ ವಿಮಲಾ ಪೂಜಾರಿ ನೆಚ್ಚಿನ ಅಭ್ಯರ್ಥಿಯಾಗಿದ್ದು, ತಾನು ಅಧ್ಯಕ್ಷೆಯಾಗಿ ಆಯ್ಕೆಯಾದಲ್ಲಿ ಮೂಲ್ಕಿಯ ಕುಡಿಯುವ ನೀರಿನ ಸಮಸ್ಯೆಗೆ ಶಾಸ್ವತ ಪರಿಹಾರ ಕಂಡುಕೊಳ್ಳುವುದಾಗಿ ತಿಳಿಸಿದ್ದಾರೆ.ಬಿಜೆಪಿಯಿಂದ ಹರ್ಷರಾಜ್ ಶೆಟ್ಟಿ,ರಾಧಿಕಾ ಕೋಟ್ಯಾನ್ ಮತ್ತು ಶೈಲೇಶ್ ಕುಮಾರ್ ಸತತ ಎರಡನೇ ಬಾರಿಗೆ ವಿಜಯಶಾಲಿಯಾಗಿದ್ದಾರೆ. ಬಿಜೆಪಿಯ ಸತೀಶ್ ಅಂಚನ್,ಶಾಂತಾ ಕಿರೋಡಿಯನ್ ಮತ್ತು ವಂದನಾ ಕಾಮತ್,ಕಾಂಗ್ರೆಸ್‍ನ ಯೋಗೀಶ್ ಕೋಟ್ಯಾನ್ ಎರಡನೇ ಬಾರಿ ವಿಜಯಿಯಾಗಿದ್ದಾರೆ. ಉಳಿದೆಲ್ಲರೂ ನಪಂಗೆ ಹೊಸ ಮುಖಗಳು.

ಮಂಗಳೂರು ತಹಶಿಲ್ದಾರ್ ಗುರುಪ್ರಸಾದ್ ತಿಳಿಸಿದಂತೆ ಸಂಸದರು ಮತ್ತು ಶಾಸಕರು ಮತಾವಕಾಶ ಪಡೆದ ಕಾರಣ ಇಲ್ಲಿ ಟಾಸ್ ಸಾಧ್ಯತೆ ಅಧಿಕ ಎಂದು ಪತ್ರಿಕೆಗೆ ತಿಳಿಸಿದ್ದಾರೆ.ಮಾಜಿ ಸಚಿನ ಅಭಯಚಂದ್ರ ಜೈನ್ ಮಾತನಾಡಿ, ಮೂಲ್ಕಿ ಜನಾದೇಶ ಕಾಂಗ್ರೆಸ್ ಪಾಲಿಗಿದೆ.ಆದರೆ ಎಮ್‍ಪಿ,ಎಮ್‍ಎಲ್‍ಎ ಮತದಿಂದ ಟಾಸ್ ಸಾಧ್ಯತೆ ಇರಬಹುದು ಎಂದಿದ್ದಾರೆ.

ಬಿಜೆಪಿಯ ದ್ವೇಷದ ರಾಜಕೀಯದಿಂದ ಕಾಂಗ್ರೆಸ್‍ಗೆ ಗೆಲುವಾಗಿದೆ.ಆಡಳಿತದಲ್ಲಿ ಅವರು ಸಂಪೂರ್ಣ ವಿಫಲರಾಗಿದ್ದಾರೆ.ಕಾಂಗ್ರೆಸ್‍ನ ಸಾಮೂಹಿಕ ನಾಯಕತ್ವದಿಂದ ಜಯ ಸಾಧ್ಯವಾಗಿದೆ.ಅಭಯಚಂದ್ರ ಜೈನ್ ನೇತೃತ್ವದಲ್ಲಿ ನಾವು ಜಯ ಗಳಿಸಿದ್ದು, ಮುಂದಿನ 5 ವರ್ಷ ಮೂಲಭೂತ ಸೌಕರ್ಯಗಳಿಗೆ ಒತ್ತುಕೊಟ್ಟು ಆಡಳಿತ ನಡೆಸಲಿದ್ದೇವೆ ಎಂದರು.

ಬಿಜೆಪಿ ಕ್ಷೇತ್ರಾಧ್ಯಕ್ಷ ಈಶ್ವರ್ ಕಟೀಲ್ ಮಾತನಾಡಿ, ನಿರೀಕ್ಷಿಸಿದಷ್ಟು ಸ್ಥಾನ ದೊರಕಿಲ್ಲ.ಆದಾಗ್ಯೂ ಆಡಳಿತ ನಡೆಸಲು ಬಿಜೆಪಿ ಸಿದ್ಧವಾಗಿದ್ದು, ಸಂಸದರ ಮತ್ತು ಶಾಸಕರ ನೇತೃತ್ವದಲ್ಲಿ ನಪಂನಲ್ಲಿ ಬಿಜೆಪಿ ಆಡಳಿತ ಮೂಡಿಬರಲಿದೆ ಎಂದಿದ್ದಾರೆ.
ಜೆಡಿಎಸ್ ಒಂದು ಕ್ಷೇತ್ರದಲ್ಲಿ ಜಯಗಳಿಸಿದ್ದು, ಬಿಜೆಪಿ ನೇತಾರರು ಅವರ ಬೆಂಬಲ ಪಡೆಯಲು ಕಾರ್ಯತಂತ್ರ ರೂಪಿಸಿದ್ದಾರೆ.