ಮಹಾರುದ್ರ ಯಾಗದಿಂದ ಲೋಕ ಕಲ್ಯಾಣ: ವಿದ್ವಾನ್ ಪಂಜ ಭಾಸ್ಕರ ಭಟ್

ಪಡುಬಿದ್ರಿ: ರುದ್ರ ದೇವರ ಪ್ರೀತ್ಯರ್ಥ ಮಹಾರುದ್ರ ಯಾಗ ನಡೆಸಿದಲ್ಲಿ ಲೋಕ ಕಲ್ಯಾಣದೊಂದಿಗೆ ಸರ್ವರಿಗೂ ಒಳಿತಾಗುವುದೆಂದು ಎಂದು ವೇದ ವಿದ್ವಾನ್ ಪಂಜ ಭಾಸ್ಕರ್ ಭಟ್ ಹೇಳಿದರು.

ಪಡುಬಿದ್ರಿ ಶ್ರೀ ಮಹಾಲಿಂಗೇಶ್ವರ ಮಹಾಗಣಪತಿ ದೇವಳದಲ್ಲಿ ಭಾನುವಾರ ಶ್ರೀ ದೇವಸ್ಥಾನದ ಆನುವಂಶಿಕ ಮೊಕ್ತೇಸರ ಹಾಗೂ ಪಡುಬಿದ್ರಿ ಬೀಡು ಅರಸರಾದ ರತ್ನಾಕರ ರಾಜ್ ಅರಸು ಕಿನ್ಯಕ್ಕ ಬಲ್ಲಾಳರ ಪಟ್ಟಾಭಿಷೇಕದ 3ನೇ ವರ್ಧಂತಿಯ ಅಂಗವಾಗಿ ಲೋಕ ಕಲ್ಯಾಣಾರ್ಥವಾಗಿ ನಡೆಸಲಾದ ಶ್ರೀ ಮಹಾರುದ್ರ ಯಾಗದ ಪೂರ್ಣಾಹುತಿಯ ಬಳಿಕ ನಡೆದ ಧಾರ್ಮಿಕ ಸಭಾ ಕಾರ್ಯಕ್ರಮದಲ್ಲಿ ಭಾಸ್ಕರ ಭಟ್ ಧಾರ್ಮಿಕ ಉಪನ್ಯಾಸವನ್ನಿತ್ತು ಮಾತನಾಡಿದರು.

ಹೊಸತು ಬರಲು ಹಳತು ಲಯವಾಗಬೇಕೆಂಬಂತೆ ರುದ್ರದೇವರ ಲಯ ಕಾರ್ಯವೂ ಸತ್ಯವೆಂಬುದನ್ನು ಅರಿತ ಮುನಿಗಳು ಮಹಾರುದ್ರ ಯಾಗದಿಂದ ಲೋಕೋತ್ತರ ಕಲ್ಯಾಣವಾಗುವುದೆಂಬ ಸತ್ಯವನ್ನೂ ಅರಿತುಕೊಂಡವರಾಗಿದ್ದಾರೆ. ಶಿವನು ಮನೋನಿಯಾಮಕನೂ ಆಗಿದ್ದು ಕುಟುಂಬಕ್ಷೇಮಕ್ಕೂ ಆತನೇ ಕಾರಣವೆನಿಸುವನು ಎಂದ ಅವರು,
ಪಡುಬಿದ್ರಿಯ ಬೀಡಿನ ಅರಸರೂ ಆಗಿರುವ ರತ್ನಾಕರ ರಾಜ್ ಅರಸ್ ಕಿನ್ಯಕ್ಕ ಬಲ್ಲಾಳರು ತಮ್ಮ ಪಟ್ಟಾಭಿಷೇಕ ವರ್ಧಂತಿಯು ದೇಗುಲದ ಇನ್ನೊಂದು ನವ ನಿರ್ಮಾಣಕ್ಕೆ ಅಡಿಪಾಯವಾಗಲಿ ಎಂಬುದನ್ನರಿತು ದೇವಸ್ಥಾನದ ಜೀರ್ಣೋದ್ಧಾರವಾಗಲಿ ಎಂಬ ಸದಾಶಯದೊಂದಿಗೆ ಈ ಮಹಾರುದ್ರಯಾಗವನ್ನು ನಡೆಸಿದ್ದಾರೆ. ಈ ಸೀಮೆಯ ಜನತೆ ಬಲು ಪುಣ್ಯವಂತರು ಎಂದರು.
ಪಡುಬಿದ್ರಿ ಬೀಡು ರತ್ನಾಕರ ರಾಜ್ ಅರಸ್ ಕಿನ್ಯಕ್ಕ ಬಲ್ಲಾಳರು ಮಾತನಾಡಿ, ತನ್ನ ಆಶಯ ಶ್ರೀ ದೇವಸ್ಥಾನದ ಅಭಿವೃದ್ಧಿ ಮಾತ್ರವಾಗಿದ್ದು ಕೈ ಬೆರಳುಗಳು ಒಂದಾಗಿ ಮುಷ್ಟಿಯಾಗುವಂತೆ ಎಲ್ಲರೂ ಸೇರಿದಾಗ ಶ್ರೀ ದೇವರ ಕಾರ್ಯಗಳೂ ಸುಲಲಿತವಾಗಿ ಕೈಗೂಡುವುದು.ಪಡುಬಿದ್ರಿ ದೇಗುಲದ ಅಭಿವೃದ್ಧಿ ಶೀಘ್ರ ನೆರವೇರುವಂತಾಗಲಿ ಎಂದರು.

ಸಭಾ ವೇದಿಕೆಯಲ್ಲಿ ಕೊರ್ನಾಯ ಶ್ರೀಪತಿ ರಾವ್, ಬ್ರಹ್ಮಸ್ಥಾನದ ಪ್ರಥಮ ಪಾತ್ರಿಗಳಾದ ಪಿ.ಜಿ.ನಾರಾಯಣ ರಾವ್, ಸೀಮೆಯ ವಿವಿಧ ಗುತ್ತುಗಳ ಪ್ರಮುಖರಾದ ಶ್ರೀನಾಥ ಹೆಗ್ಡೆ, ವಿಜಯ ಹೆಗ್ಡೆ, ಅನಿಲ್‍ಕುಮಾರ್ ಶೆಟ್ಟಿ, ಶೇಖರ ಶೆಟ್ಟಿ, ಸದಾನಂದ ಶೆಟ್ಟಿ, ಧನಪಾಲ್ ಶೆಟ್ಟಿ ಉಪಸ್ಥಿತರಿದ್ದರು.

ರಾಜೇಶ್ ಶೇರಿಗಾರ್ ಸ್ವಾಗತಿಸಿ ಕಾರ್ಯಕ್ರಮ ನಿರ್ವಹಿಸಿ ವಂದಿಸಿದರು. ಶ್ರೀ ದೇವಸ್ಥಾನದಲ್ಲಿ ಹೆಜಮಾಡಿಯ ವೇದ ಮೂರ್ತಿ ಶ್ರೀಹರಿ ಭಟ್ ನೇತೃತ್ವದಲ್ಲಿ ಮಹಾರುದ್ರ ಯಾಗವು ಸಂಪನ್ನಗೊಂಡಿತು.ಬಳಿಕ ಸಾರ್ವಜನಿಕ ಅನ್ನಸಂತರ್ಪಣೆ ನಡೆಯಿತು.