ಮಂಗಳೂರು ಆಟಗಾರರನ್ನೊಳಗೊಂಡ ಪಡುಬಿದ್ರಿ ಮೊಹಮ್ಮಡನ್ ತಂಡಕ್ಕೆ ಕಂಚಿನಡ್ಕ ಕೆಎಫ್‍ಸಿ ಟ್ರೋಫಿ-2018

ಹೊರರಾಜ್ಯ ಆಟಗಾರರ ಎದುರು ರಾಜ್ಯ ಆಟಗಾರರ ಪ್ರಾಬಲ್ಯ

ಪಡುಬಿದ್ರಿ: ಇಲ್ಲಿನ ಕಂಚಿನಡ್ಕ ಫ್ರೆಂಡ್ಸ್ ಸರ್ಕಲ್ ಸ್ಪೋಟ್ರ್ಸ್ ಮತ್ತು ಕಲ್ಚರಲ್ ಕ್ಲಬ್ ಆಶ್ರಯದಲ್ಲಿ ಕಂಚಿನಡ್ಕದ ನವನಿರ್ಮಾಣ ಕೆಎಫ್‍ಸಿ ಕ್ರೀಡಾಂಗಣದಲ್ಲಿ ಶನಿವಾರ ರಾತ್ರಿ ನಡೆದ ಅಂತಾರಾಜ್ಯ ವಾಲಿಬಾಲ್ ಪಂದ್ಯಾಟದಲ್ಲಿ ತಮಿಳುನಾಡು,ಮಹಾರಾಷ್ಟ್ರ,ಕೇರಳ ಆಟಗಾರರಿದ್ದ ತಂಡಗಳೆದುರು ಕರ್ನಾಟಕದ ಆಟಗಾರರೇ ಪ್ರಾಬಲ್ಯ ಮೆರೆದು ರಾಜ್ಯದ ಆಟಗಾರರೇ ಇದ್ದ ತಂಡಗಳೆರಡು ಫೈನಲ್ ಹಣಾಹಣಿ ನಡೆಸಿದ್ದು,ಮಂಗಳೂರು ಆಟಗಾರರಿಂದಲೇ ತುಂಬಿದ ಪಡುಬಿದ್ರಿಯ ಮೊಹಮ್ಮಡನ್ ತಂಡವು ಪ್ರಶಸ್ತಿ ಗಳಿಸುವಲ್ಲಿ ಯಶಸ್ವಿಯಾಗಿದೆ.
ಬೆಂಗಳೂರು,ಶಿವಮೊಗ್ಗ ಆಟಗಾರರಿದ್ದ ಜಾಕ್ಸನ್ ಮುಚ್ಚೂರು ಮಾಲೀಕತ್ವದ ಮುಚ್ಚೂರು ಪ್ರಗತಿ ಫ್ರೆಂಡ್ಸ್ ತಂಡವನ್ನು ಮಂಗಳೂರಿನ ಯುವ ಆಟಗಾರರೇ ಆಡಿದ್ದ ಸೌದಿ ಅರೇಬಿಯಾದ ಆಸಿಫ್ ಮಾಲೀಕತ್ವದ ಮೊಹಮ್ಮಡನ್ ತಂಡವು ಜಿದ್ದಾಜಿದ್ದಿನ ಹೋರಾಟದಲ್ಲಿ 25-22,25-23 ಅಂಕಗಳಿಂದ ಸೋಲಿಸಿ ಕೆಎಫ್‍ಸಿ ಟ್ರೋಫಿ-2018 ಸಹಿತ ನಗದು ರೂ.50 ಸಾವಿರ ಪಡೆಯಿತು.ಮೊಹಮ್ಮಡನ್ ತಂಡದ ಗಿಡ್ಡಾಳುಗಾಗಿದ್ದ ರಾಜ್ಯ ಕಿರಿಯರ ವಾಲಿಬಾಲ್ ತಂಡದ ನಾಯಕ ಅನುಷ್ ಸುವರ್ಣ,ರಾಕಿ ಮತ್ತು ನಿಕಿಲ್ ಶೆಟ್ಟಿ ಅತ್ಯುತ್ತಮ ಆಟದಿಂದ ಪ್ರೇಕ್ಷಕರ ಗಮನ ಸೆಳೆದರು.

ಫೈನಲ್‍ನಲ್ಲಿ ಸೋತ ಮುಚ್ಚೂರು ಪ್ರಗತಿ ಫ್ರೆಂಡ್ಸ್ ದ್ವಿತೀಯ ಟ್ರೋಫಿ ಸಹಿತ ನಗದು ರೂ.30 ಸಾವಿರ ಪಡೆಯಿತು.

ಮೊಹಮ್ಮಡನ್ ತಂಡವು ಸೆಮಿಫೈನಲ್‍ನಲ್ಲಿ ಕಂಚಿನಡ್ಕದ ಆಸಿಫ್ ಮತ್ತು ಫಯಾಝ್ ಎಸ್‍ಪಿ ಮಾಲೀಕತ್ವದ ಆಪತ್ಭಾಂಧವ ಅರಾಫಾ ಬಾಯ್ಸ್ ತಂಡವನ್ನು 25-18,27-25 ಅಂಕಗಳಿಂದಲೂ,ಪ್ರಗತಿ ಫ್ರೆಂಡ್ಸ್ ತಂಡವು ಸುರೇಂದ್ರ ಕುಂಟಾಡಿ ಮಾಲೀಕತ್ವದ ರಕ್ತೇಶ್ವರೀ ಫ್ರೆಂಡ್ಸ್ ತಂಡವನ್ನು 25-17,26-24 ಅಂಕಗಳಿಂದಲೂ ಸೋಲಿಸಿ ಫೈನಲ್ ಪ್ರವೇಶಿಸಿತ್ತು.

ಆಪತ್ಭಾಂಧವ ಅರಾಫಾ ಬಾಯ್ಸ್ ತಂಡವು ತೃತೀಯ ಟ್ರೋಫಿ ಸಹಿತ ನಗದು ರೂ.20 ಸಾವಿರ, ರಕ್ತೇಶ್ವರೀ ಫ್ರೆಂಡ್ಸ್ ಕುಂಟಾಡಿ ತಂಡವು ಚತುರ್ಥ ಟ್ರೋಫಿ ಸಹಿತ ನಗದು ರೂ.10 ಸಾವಿರ ಪಡೆಯಿತು.

ಬಲಿಷ್ಠ ತಮಿಳುನಾಡು,ಕೇರಳ ಆಟಗಾರರಿದ್ದ ತಂಡಗಳನ್ನು ಹಿಮ್ಮೆಟ್ಟಿಸುವಲ್ಲಿ ಮಹತ್ತರ ಪಾತ್ರ ವಹಿಸಿದ ಪ್ರಗತಿ ತಂಡದ ಫೈಝ್ ಅತ್ಯುತ್ತಮ ಆಲ್‍ರೌಂಡರ್ ವೈಯಕ್ತಿಕ ಪ್ರಶಸ್ತಿ ಪಡೆದರೆ,ಅತ್ಯುತ್ತಮ ಲಿಬ್ರೋ ಆಗಿ ಅದೇ ತಂಡದ ಹರಿಪ್ರಸಾದ್,ಅತ್ಯುತ್ತಮ ಬ್ಲಾಕರ್ ಆಗಿ ಪ್ರಗತಿ ತಂಡದ ಭರತ್,ಅತ್ಯುತ್ತಮ ಎಟ್ಯಾಕರ್ ಆಗಿ ಮೊಹಮ್ಮಡನ್ ತಂಡದ ಅಶ್ವಲ್ ರೈ,ಅತ್ಯುತ್ತಮ ಲಿಫ್ಟರ್ ಆಗಿ ಅದೇ ತಂಡದ ಸಾವನ್ ವೈಯಕ್ತಿಕ ಪ್ರಶಸ್ತಿ ಪಡೆದರು.

ಉಡುಪಿ ಜಿಪಂ ಸಾಮಾಜಿಕ ನ್ಯಾಯ ಸಮಿತಿಯ ಅಧ್ಯಕ್ಷ ಹಾಗೂ ಕೆಎಫ್‍ಸಿಯ ಗೌರವಾಧ್ಯಕ್ಷ ಶಶಿಕಾಂತ್ ಪಡುಬಿದ್ರಿ,ಪಡುಬಿದ್ರಿ ಫ್ರೆಂಡ್ಸ್ ಅಧ್ಯಕ್ಷ ನವೀನ್‍ಚಂದ್ರ ಜೆ.ಶೆಟ್ಟಿ,ಪತ್ರಕರ್ತ ಹರೀಶ್ ಹೆಜ್ಮಾಡಿ,ದಸಂಸ ಸಂಚಾಲಕ ಲೋಕೇಶ್ ಪಡುಬಿದ್ರಿ,ಕೆಎಫ್‍ಸಿ ಅಧ್ಯಕ್ಷ ದಿನೇಶ್ ಕೋಟ್ಯಾನ್,ಹಿರಿಯ ವಾಲಿಬಾಲ್ ಆಟಗಾರ ಬಶೀರ್ ಕಂಚಿನಡ್ಕ,ಇಮ್ತಿಯಾಝ್,ಅಶ್ಫಾಕ್,ಶಂಕರ್,ಪ್ರಕಾಶ್ ಇಮ್ಯಾನುವೆಲ್ ವಿಜೇತರಿಗೆ ಬಹುಮಾನ ವಿತರಿಸಿದರು.

ರೆಫ್ರಿಗಳಾದ ಸಂದೀಪ್‍ಕುಮಾರ್,ಉದಯಕುಮಾರ್,ನಾಗರಾಜ್ ಭಟ್,ನಾಗೇಶ್,ಪಿ.ಶಿವನ್,ಆನಂದ್,ಶಿವ ಕುಮಾರ್,ವಿಕಾಸ್,ಶಿವಾನಂದ,ಪ್ರಸನ್ನ,ಬಾಹುಬಲಿ,ಸ್ಕೋರರ್‍ಗಳಾದ ಸುಜಿತ್ ಶೆಟ್ಟಿ,ಸುಧೀರ್,ವೀಕ್ಷಕ ವಿವರಣೆಗಾರರಾದ ನಾಗೇಶ್ ಮತ್ತು ದಿನೇಶ್,ಚೇತನ್ ಶಂಕರಪುರ ಉಪಸ್ಥಿತರಿದ್ದರು.
ಕೆಎಫ್‍ಸಿ ಕಾರ್ಯದರ್ಶಿ ಸಂತೋಷ್ ನಂಬಿಯಾರ್ ಕಾರ್ಯಕ್ರಮ ನಿರ್ವಹಿಸಿದರು.

ಫೋಟೋ:16ಎಚ್‍ಕೆ1,1ಎ
16ಎಚ್‍ಕೆ1-ಪ್ರಶಸ್ತಿ ವಿಜೇತ ಮೊಹಮ್ಮಡನ್ ತಂಡ,1ಎ-ದ್ವಿತೀಯ ಪ್ರಶಸ್ತಿ ವಿಜೇತ ಪ್ರಗತಿ ಮುಚ್ಚೂರು ತಂಡ.