ಪಡುಬಿದ್ರಿ ಜೈ ಭೀಮ್ ಟ್ರೋಫಿ ರಾಜ್ಯ ಮಟ್ಟದ ಕ್ರಿಕೆಟ್ ಪಂದ್ಯಾಟ ಆರಂಭ

ಬಲಿಷ್ಠ ಪಾಂಗಾಳ ಮಾಣಿಕ್ಯ ಕ್ರಿಕೆಟರ್ಸ್ ಫೈನಲ್‍ಗೆ

ಪಡುಬಿದ್ರಿ ಇಲ್ಲಿನ ಬೋರ್ಡ್ ಶಾಲಾ ಮೈದಾನದಲ್ಲಿ ಶನಿವಾರ ಆರಂಭಗೊಂಡ ರಾಜ್ಯ ಮಟ್ಟದ ಕ್ರಿಕೆಟ್ ಪಂದ್ಯಾಟ ಜೈ ಭೀಮ್ ಟ್ರೋಫಿ-2018ರಲ್ಲಿ ಅವಿಭಜಿತ ದಕ ಜಿಲ್ಲೆಯ ಬಲಿಷ್ಠ ಪಾಂಗಾಳ ಮಾಣಿಕ್ಯ ಕ್ರಿಕೆಟರ್ಸ್ ತಂಡವು ಮೊದಲ ತಂಡವಾಗಿ ಫೈನಲ್ ಪ್ರವೇಶಿಸಿದೆ.

ಶನಿವಾರ ಸಂಜೆ ನಡೆದ ಸೆಮಿಫೈನಲ್‍ನಲ್ಲಿ ಪಾದೆಬೆಟ್ಟು ಫ್ರೆಂಡ್ಸ್ ತಂಡನ್ನು 10 ವಿಕೆಟ್‍ಗಳಿಂದ ಸೋಲಿಸಿ ಮಾಣಿಕ್ಯ ತಂಡವು ಫೈನಲ್ ಪ್ರವೇಶಿಸಿತು.ಮಾಣಿಕ್ಯ ತಂಡದ ಆರಂಭಿಕ ಸಂದೀಪ್ ಪಂದ್ಯಶ್ರೇಷ್ಠ ಪ್ರಶಸ್ತಿ ಪಡೆದರು.ಕ್ವಾರ್ಟರ್ ಫೈನಲ್‍ಗಳಲ್ಲಿ ಮಾಣಿಕ್ಯ ತಂಡವು ಬೈಲೂರು ವಾಸುಕಿ ಕ್ರಿಕೆಟರ್ಸ್ ತಂಡವನ್ನು 25 ರನ್‍ಗಳಿಂದಲೂ,ಪಾದೆಬೆಟ್ಟು ಫ್ರೆಂಡ್ಸ್ ತಂಡವು ತೊಟ್ಟಂ ಅಜಯ್ ಕ್ರಿಕೆಟರ್ಸ್ ತಂಡವನ್ನು 9 ವಿಕೆಟ್‍ಗಳಿಂದಲೂ ಸೋಲಿಸಿ ಸೆಮಿಫೈನಲ್ ಪ್ರವೇಶಿಸಿತ್ತು.

 

ಶನಿವಾರ ಎ ವಿಭಾಗದಲ್ಲಿ ಅವಿಭಜಿತ ದಕ ಜಿಲ್ಲೆಯ 15 ತಂಡಗಳು ಸೆಣಸಾಟ ನಡೆಸಿದ್ದು,ಭಾನುವಾರ ಬಿ ವಿಭಾಗದಲ್ಲಿ ಶಿವಮೊಗ್ಗ,ದಾವಣಗೆರೆ,ಚಿಕ್ಕಮಗಳೂರು,ಹೊರನಾಡು,ಸಕಲೇಶಪುರ,ಬೆಳಗಾವಿ ಮತ್ತು ಹಾಸನದ 15 ತಂಡಗಳು ಸೆಣಸಾಟ ನಡೆಸಲಿವೆ.

ಕರ್ನಾಟಕ ದಸಂಸ ಅಂಬೇಡ್ಕರ್ ವಾದದ ಪಡುಬಿದ್ರಿ ಗ್ರಾಮ ಶಾಖೆ ವತಿಯಿಂದ ಎಸ್‍ಸಿ ಮತ್ತು ಎಸ್‍ಟಿಗಳಿಗಾಗಿ ಪಂದ್ಯಾಟ ಆಯೋಜಿಸಲಾಗಿತ್ತು.


ಉದ್ಘಾಟನೆ: ಕರ್ನಾಟಕ ದಲಿತ ಸಂಘರ್ಷ ಸಮಿತಿ(ಅಂಬೇಡ್ಕರ್ ವಾದ)ಯ ಪಡುಬಿದ್ರಿ ಘಟಕದ ವತಿಯಿಂದ ಪಡುಬಿದ್ರಿಯ ಬೋರ್ಡ್ ಶಾಲಾ ಮೈದಾನದಲ್ಲಿ ಎರಡು ದಿನಗಳ ಕಾಲ ನಡೆಯುವ ರಾಜ್ಯ ಮಟ್ಟದ ಕ್ರಿಕೆಟ್ ಪಂದ್ಯಾಟ “ಜೈ ಭೀಮ್ ಟ್ರೋಫಿ-2018” ಶನಿವಾರ ಚಾಲನೆ ನೀಡಲಾಯಿತು.

ಪಡುಬಿದ್ರಿ ದಸಂಸ ಸಂಚಾಲಕ ಲೋಕೇಶ್ ಕಂಚಿನಡ್ಕ ಮಾತನಾಡಿ, ಸಮಾಜದಲ್ಲಿ ಕ್ರೀಡಾ ಪ್ರತಿಭೆಗಳನ್ನು ಗುರುತಿಸಿ ಅವರನ್ನು ಸಮಾಜದ ಮುಖ್ಯವಾಹಿನಿಗೆ ತರುವ ಮೂಲಕ ಓರ್ವ ಉತ್ತಮ ಕ್ರೀಡಾಪಟುವನ್ನಾಗಿ ಮಾಡುವುದು ಗುರಿಯಾಗಿದೆ. ಅಲ್ಲದೆ ಸಮಾಜದಲ್ಲಿ ಅನಾರೋಗ್ಯ ಪೀಡಿತರ ನೆರವಿಗಾಗಿ ಪಮದ್ಯಾಟದ ಉಲಿಕೆಯ ಹಣವನ್ನು ಬಳಸಲಾಗುವುದು ಎಂದರು.

ತಾಲ್ಲೂಕು ಪಂಚಾಯಿತಿ ಸದಸ್ಯರಾದ ನೀತಾ ಗುರುರಾಜ್, ದಿನೇಶ್ ಕೋಟ್ಯಾನ್ ಫಲಿಮಾರು, ಪಡುಬಿದ್ರಿ ಗ್ರಾಪಂ ಅಧ್ಯಕ್ಷೆ ದಮಯಂತಿ ವಿ.ಅಮೀನ್,ಕೆಪಿಸಿಸಿಯ ಸಂಚಾಲಕ ಭಾಸ್ಕರ್ ಪಡುಬಿದ್ರಿ, ಉಚ್ಚಿಲ ಶಾಖೆಯ ದಸಂಸ ಪ್ರಧಾನ ಸಂಚಾಲಕ ದಿನಕರ ಉಚ್ಚಿಲ, ದಿಲೀಪ್ ಕುಮಾರ್,ರವೀಂದ್ರ ಸಾಲ್ಯಾನ್,ಗ್ರಾಮ ಪಂಚಾಯಿತಿ ಸದಸ್ಯರಾದ ಬುಡಾನ್ ಸಾಹೇಬ್, ನವೀನ್ ಎನ್.ಶೆಟ್ಟಿ, ದಿನೇಶ್ ಕೋಟ್ಯಾನ್, ನಯನ, ದಸಂಸ ಮಹಿಳಾ ಒಕ್ಕೂಟದ ಅಧ್ಯಕ್ಷೆ ವಸಂತಿ,ಸೀತಾರಾಮ ಮತ್ತಿತರರು ಉಪಸ್ಥಿತರಿದ್ದರು.