ಕಾರ್ಮಿಕರಲ್ಲಿಅರಿವು ಪ್ರಜ್ಞೆ ಕಡಿಮೆಯ ಕಾರಣ ಬಂಡವಾಳಶಾಹಿಗಳಿಗೆ ಸುಲಭಸಾಧ್ಯ- ಪ್ರತಾಪ್ ಸಿಂಹ

ಪಡುಬಿದ್ರಿ: ಭಾರತದ ಕಾರ್ಮಿಕರಲ್ಲಿ ಕಾನೂನುಗಳ ಅರಿವಿನ ಬಗ್ಗೆ ಸಾಕಷ್ಟು ಅರಿವು ಇಲ್ಲದಿರುವದರಿಂದಲೇ ಬಂಡವಾಳಶಾಹಿಗಳು ಸುಲಭ ಸಾಧ್ಯವಾಗಿ ಕಾರ್ಮಿಕರನ್ನು ಶೋಷಿಸುತ್ತಿದ್ದಾರೆ ಎಂದು ಸಿಐಟಿಯು ಕರ್ನಾಟಕ ರಾಜ್ಯ ಸಮಿತಿಯ ಕಾರ್ಯದರ್ಶಿ ಪ್ರತಾಪ್‍ಸಿಂಹ ಹೇಳಿದರು.

ಪಡುಬಿದ್ರಿಯ ಹೋಟೆಲ್ ಅಮರ್ ಕಂಫಟ್ರ್ಸ್‍ನ ಸಿರಿ ಗಾಡನ್‍ನಲ್ಲಿ ಭಾನುವಾರ ನಡೆದ ಯುಪಿಸಿಎಲ್ ಎಂಪ್ಲಾಯಿಸ್ ಯೂನಿಯನ್ ಸಿಐಟಿಯು ಘಟಕವನ್ನು ಉದ್ಘಾಟಿಸಿ ಅವರು ಮಾತನಾಡಿದರು.

ಎಲ್ಲರನ್ನೂ ಒಗ್ಗಟ್ಟಾಗಿ ನಿಲ್ಲಿಸುವುದೇ ದೊಡ್ಡ ಸವಾಲು. ಆ ಸವಾಲನ್ನು ಮೆಟ್ಟಿ ನಿಂತರೆ ಯಶಸ್ಸು ಖಚಿತ. ಸಂವಿಧಾನ ನಮ್ಮ ಹಕ್ಕುಗಳನ್ನು ಖಾತ್ರಿಗೊಳಿಸಿದೆ. ಆದಾಗ್ಯೂ ಮಾಲೀಕರು ಎಲ್ಲೆಡೆ ಕಾನೂನನ್ನು ಉಲ್ಲಂಘಿಸುತ್ತಿದ್ದಾರೆ. ಕಾರ್ಮಿಕರಿಗಾಗಿ 44 ಕಾನೂನುಗಳಿದ್ದು ಅವೆಲ್ಲವನ್ನೂ ಪ್ರತಿಯೊಬ್ಬ ಕಾರ್ಮಿಕನೂ ತಿಳಿದುಕೊಳ್ಳಲೇಬೇಕು. ಪ್ರಸ್ತುತ ಕಾರ್ಮಿಕರ ಶ್ರಮಕ್ಕೆ ತಕ್ಕ ಪ್ರತಿಫಲ ಸಿಗುತ್ತಿಲ್ಲ. ಸಮಾನ ಶ್ರಮ, ಸಮಾನ ವೇತನ ಸೂಕ್ತವಾಗಿ ಜಾರಿಗೆ ಬಂದಲ್ಲಿ ಪ್ರತಿಯೊಬ್ಬ ಕಾರ್ಮಿಕನ ಬಾಳೂ ಉತ್ತಮವಾಗಲಿದೆ. ಬಂಡವಾಳಶಾಹಿಗಳು ಕಾರ್ಮಿಕ ಕಾನೂನುಗಳನ್ನು ಜಾರಿಗೆ ಬರಲು ಅವಕಾಶ ನೀಡುತ್ತಿಲ್ಲ ಎಂದವರು ಹೇಳಿದರು.

ಕಾರ್ಮಿಕ ಕಾನೂನುಗಳನ್ನು ಸರಿಯಾಗಿ ತಿಳಿದುಕೊಂಡು ಐಕ್ಯತೆಯಿಂದ ಮುಂದುವರಿಯಬೇಕಾಗಿದೆ. ಯಾವುದೇ ಕಾರಣಕ್ಕೂ ಆಸೆ ಆಮಿಷಗಳಿಗೆ ಬಲಿಯಾಗದಿರಿ. ನಿಮ್ಮ ಯಾವುದೇ ಸಮಸ್ಯೆಗಳಿಗೆ ಸಿಐಟಿಯು ಸೂಕ್ತವಾಗಿ ಸ್ಪಂದಿಸುತ್ತದೆ ಎಂದವರು ಹೇಳಿದರು.
ನಮಗೆ ಸಿಗಬೇಕಾದ ವೇತನ, ಕೂಲಿ, ಸೌಲಭ್ಯ ಪಡೆಯಲು ಸಂಘಟನೆ ಅನಿವಾರ್ಯ. ಸಂವಿಧಾನಬದ್ಧ ಕಾನೂನು ಮೂಲಕ ನಮ್ಮ ಹೋರಾಟ ಮುಂದುವರಿಯಲಿದೆ ಎಂದವರು ಹೇಳಿದರು.

ಯುಪಿಸಿಎಲ್ ಎಂಪ್ಲಾಯಿಸ್ ಯೂನಿಯನ್ ಸಿಐಟಿಯು ಎಲ್ಲೂರು ಘಟಕದ ಅಧ್ಯಕ್ಷ ಲೋಕಯ್ಯ ಪ್ರಾಸ್ತಾವಿಕ ಮಾತನಾಡಿ, 2005ರಲ್ಲಿ ಕಾರ್ಯಾರಂಭಗೊಂಡ ಯುಪಿಸಿಎಲ್ ಘಟಕದಲ್ಲಿ ಹಲವು ಎಡರು ತೊಡರುಗಳ ಮೂಲಕ 2017ರಲ್ಲಿ ಸಿಐಟಿಯು ಕಾರ್ಮಿಕ ಸಂಘಟನೆಯ ನೋಂದಣಿಗಾಗಿ ಅರ್ಜಿ ಸಲ್ಲಿಸಿದ್ದರೂ ಒತ್ತಡಗಳಿಂದ ತಡೆ ನೀಡಲಾಯಿತು. ಆದಾಗ್ಯೂ ಸಿಐಟಿಯು ರಾಜ್ಯ ಘಟಕದ ಸತತ ಪರಿಶ್ರಮದ ಫಲವಾಗಿ ಅರ್ಜಿ ಸಲ್ಲಿಸಿ ಒಂದೂವರೆ ವರ್ಷದ ಬಳಿಕ ಕಾರ್ಮಿಕ ಸಂಘಟನೆ ನೋದಣಿಯಾಗಿದೆ. ನಮ್ಮ ಸಂಘಟನೆ ಕಂಪನಿ ವಿರುದ್ಧವಲ್ಲ. ಕಾರ್ಮಿಕರಿಗೆ ಅನ್ಯಾಯವಾದಾಗ ಕಾನೂನಾತ್ಮಕ ಹೋರಾಟ ನಡೆಸಿ ಪರಿಹಾರ ಕಂಡುಕೊಳ್ಳಲಾಗುವುದು. ಊರಿನ ಗಣ್ಯರ ಸಲಹೆ ಸೂಚನೆ ಮೇರೆಗೆ ನಮ್ಮ ಸಂಘಟನೆ ಕಾರ್ಯಾಚರಿಸಲಿದೆ ಎಂದು ಹೇಳಿದರು.

ಸನ್ಮಾನ: ಯುಪಿಸಿಎಲ್ ಎಂಪ್ಲಾಯಿಸ್ ಯೂನಿಯನ್ ಸಿಐಟಿಯು ಘಟಕದ ಸ್ಥಾಪನೆಗೆ ಸಹಕರಿಸಿದ ಯುಪಿಸಿಎಲ್ ಎಂಪ್ಲಾಯಿಸ್ ಯೂನಿಯನ್ ಸಿಐಟಿಯು ಗೌರವಾಧ್ಯಕ್ಷ ಬಾಲಕೃಷ್ಣ ಶೆಟ್ಟಿ ಮತ್ತು ರಾಜ್ಯ ಸಮಮಿತಿಯ ಕಾರ್ಯದರ್ಶಿ ಪ್ರತಾಪ್‍ಸಿಂಹರವರನ್ನು ಸಂಯೋಜಕರ ವತಿಯಿಂದ ಸನ್ಮಾನಿಸಲಾಯಿತು.

ಯುಪಿಸಿಎಲ್ ಎಂಪ್ಲಾಯಿಸ್ ಯೂನಿಯನ್ ಸಿಐಟಿಯು ಎಲ್ಲೂರು ಘಟಕದ ಗೌರವಾಧ್ಯಕ್ಷ ಬಾಲಕೃಷ್ಣ ಶೆಟ್ಟಿ ಸಮಾರಂಭದ ಅಧ್ಯಕ್ಷತೆ ವಹಿಸಿ ಶುಭ ಹಾರೈಸಿದರು. ದಸಂಸ ಮೈಸೂರು ವಿಭಾಗದ ಸಂಚಾಲಕ ಶೇಖರ್ ಹೆಜ್ಮಾಡಿ ಮುಖ್ಯ ಭಾಷಣ ಮಾಡಿ, ನೂತನ ಕಾರ್ಮಿಕ ಸಂಘಟನೆಗೆ ಬೆಂಬಲ ಘೋಷಿಸಿದರು.

ಬಿಜೆಪಿ ಕಾಪು ಕ್ಷೇತ್ರಾಧ್ಯಕ್ಷ ಪ್ರಕಾಶ್ ಶೆಟ್ಟಿ ಪಾದೆಬೆಟ್ಟು, ಕಾಪು ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷ ನವೀನ್‍ಚಂದ್ರ ಸುವರ್ಣ ಅಡ್ವೆ, ಮಾಜಿ ಅಧ್ಯಕ್ಷ ನವೀನ್‍ಚಂದ್ರ ಜೆ.ಶೆಟ್ಟಿ, ಪಲಿಮಾರು ಗ್ರಾಪಂ ಅಧ್ಯಕ್ಷ ಜಿತೇಂದ್ರ ಫುರ್ಟಾಡೋ, ಉಡುಪು ವೈನ್ ಮರ್ಚೆಂಟ್ ಅಸೋಸಿಯೇಶನ್ ಅಧ್ಯಕ್ಷ ಮಿಥುನ್ ಆರ್.ಹೆಗ್ಡೆ, ಉಡುಪಿ ಜಿಲ್ಲಾ ಯುವ ಕಾಂಗ್ರೆಸ್ ಅಧ್ಯಕ್ಷ ವಿಶ್ವಾಸ್ ವಿ.ಅಮೀನ್, ಬಳ್ಕುಂಜೆ ಗ್ರಾಪಂ ಅಧ್ಯಕ್ಷ ದಿನೇಶ್ ಪುತ್ರನ್, ಜಿಪಂ ಸದಸ್ಯ ಶಶಿಕಾಂತ್ ಪಡುಬಿದ್ರಿ, ಪಲಿಮಾರು ತಾಪಂ ಅಧ್ಯಕ್ಷ ದಿನೇಶ್ ಕೋಟ್ಯಾನ್, ಪಡುಬಿದ್ರಿ ಗ್ರಾಪಂ ಸದಸ್ಯರಾದ ಕರುಣಾಕರ ಸಾಲ್ಯಾನ್, ರವಿ ಕುಮಾರ್ ಮತ್ತು ಹಸನ್ ಬಾವ, ನಂದಿಕೂರು ಹಿಂದೂ ಸಂಘಟನೆಯ ಮುಖಂಡ ಮಹೇಶ್ ಶೆಟ್ಟಿ, ಎಲ್ಲೂರು ಹಿಂದೂ ಜಾಗರಣ ವೇದಿಕೆಯ ಅಧ್ಯಕ್ಷ ಕಿರಣ್ ರಾವ್, ಉದ್ಯಮಿ ಕಿಶೋರ್ ಪೂಜಾರಿ ಎರ್ಮಾಳು, ಕರವೇ ಕಾಪು ತಾಲೂಕು ಅಧ್ಯಕ್ಷ ನಿಜಾಮುದ್ದೀನ್, ದಸಂಸ ಪಡುಬಿದ್ರಿ ಘಟಕದ ಸಂಚಾಲಕ ಕೀರ್ತಿಕುಮಾರ್, ಕರವೇ ಯುವಸೇನೆಯ ಜಿಲ್ಲಾಧ್ಯಕ್ಷ ಅಬ್ದುಲ್ ರಹಿಮಾನ್, ಬಸ್ಸು ಏಜೆಂಟ್ ಬಳಗದ ಅರವಿಂದ್ ಪಡುಬಿದ್ರಿ, ಲಕ್ಷ್ಮಣ, ಪ್ರತೀಕ್ ಕೋಟ್ಯಾನ್ ನಂದಿಕೂರು ಮುಖ್ಯ ಅತಿಥಿಗಳಾಗಿದ್ದರು.

ವೀಣೇಶ್ ಅಮೀನ್ ಸಾಂತೂರು ಕಾರ್ಯಕ್ರಮ ನಿರ್ವಹಿಸಿದರು. ಲೋಕಯ್ಯ ಸ್ವಾಗತಿಸಿದರು.