ಕಥೆ ಹಲವು; ಕುಟುಂಬ ಒಂದೇ-ಪಡುಬಿದ್ರಿ ಬೀಚ್‍ನಲ್ಲಿ ವಿಶೇಷ ಚೇತನರ ಸಮ್ಮಿಲನ

ಬ್ಲೂ ಫ್ಲ್ಯಾಗ್ ಖ್ಯಾತಿಯ ಪಡುಬಿದ್ರಿ ಬೀಚ್‍ನಲ್ಲಿ ವಿಶೇಷ ಚೇತನರ ಗುಂಪು ಬೀಚ್‍ಗೆ ಆಗಮಿಸಿದ ಪ್ರವಾಸಿಗರ ಗಮನ ಸೆಳೆದಿದೆ. ಜಿಲ್ಲೆಯ ನಾನಾ ಕಡೆಗಳಿಂದ ಆಗಮಿಸಿದ ವಿಶೇಷ ಚೇತನರು ಪಡುಬಿದ್ರಿ ಬೀಚ್‍ನಲ್ಲಿ ಸುತ್ತಾಡಿ ಪರಸ್ಪರ ನೋವು ನಲಿವುಗಳನ್ನು ಹಂಚಿಕೊಂಡು ಖುಷಿ ಪಟ್ಟರು.

ಇವರದ್ದೆಲ್ಲಾ ಕಥೆಗಳು ಹಲವು. ಆದರೂ ಇವರ ಕುಟುಂಬವೊಂದೇ. ಕುಂದಾಪುರ, ಕಾರ್ಕಳ, ಬೆಳ್ಮಣ್, ಅಡ್ವೆ ಮತ್ತಿತರ ಪ್ರದೇಶಗಳಿಂದ ಬಂದಿದ್ದ ವಿಶೇಷ ಚೇತನರು ಪಡುಬಿದ್ರಿ ಬೀಚ್‍ನಲ್ಲಿ ಸೇರಿ ತಮ್ಮ ತಮ್ಮೊಳಗೇ ಹಾಸ್ಯ ಚಟಾಕಿಗಳನ್ನು ಹಾರಿಸಿಕೊಂಡು, ಕಷ್ಟಗಳನ್ನೆಲ್ಲಾ ಮರೆತು ನಗುವಿನ ಅಲೆಯಲ್ಲೇ ಸಮಯವನ್ನು ಕಳೆದು ತಮ್ಮೂರಿಗೆ ವಾಪಸಾಗಿದ್ದಾರೆ.
ಎರ್ಮಾಳಿನ ಹಿದಾಯತ್ ಎಂಬವರ ಕುಟುಂಬವು ‘ನಮ್ಮೂರ ಬೀಚ್ ನೋಡಬನ್ನಿ’ ಎಂದು ತಮ್ಮೆಲ್ಲಾ ಸಹೋದರ, ಸಹೋದರಿಯರನ್ನು ಪಡುಬಿದ್ರಿ ಬೀಚ್‍ಗೆ ಅಹ್ವಾನಿಸಿದ್ದರು. ಹಾಗಾಗಿ ಕುಂದಾಪುರ ಹೆಮ್ಮಾಡಿಯ ನಂದ್ಯಪ್ಪ ಶೆಟ್ಟಿ, ಶಾರದಾ ಹಟ್ಟಿಯಂಗಡಿ, ಭಾಗ್ಯವತಿ ಮರವಂತೆ, ಶಶಿಧರ ಪೂಜಾರಿ ಕಲ್ಲಮುಂಡ್ಕೂರು, ವಿದ್ಯಾ ಶೆಟ್ಟಿ ಅಡ್ವೆ, ಉಮೇಶ ಶೆಟ್ಟಿ ಕಾರ್ಕಳ ಸೇರಿದಂತೆ ಸುಮಾರು 20 ಮಂದಿ ಮಧ್ಯಾಹ್ನದ ಹೊತ್ತಿಗೆ ಪಡುಬಿದ್ರಿ ಬೀಚ್‍ನ ಗಾಳಿಗೋಪುರಕ್ಕೆ ಆಗಮಿಸಿ ಸಂಭ್ರಮಿಸಿದ್ದರು. ತಮ್ಮೆಲ್ಲಾ ಸುಖ ಕಷ್ಟಗಳನ್ನು ಪರಸ್ಪರ ಹಂಚಿಕೊಂಡು ಗಮನ ಸೆಳೆದರು.

ನಮಗೂ ಮೀಸಲಾತಿ ನೀಡಿ: ಉಡುಪಿ ಜಿಲ್ಲೆಯಲ್ಲಿ ಸುಮಾರು 17000-18000 ವಿಶೇಷ ಚೇತನರಿದ್ದಾರೆ. ನಮ್ಮನ್ನು ವಿಶ್ವ ವಿಶೇಷ ಚೇತನರ ದಿನದಂದು ಜಿಲ್ಲಾಡಳಿತವು ಕರೆಸಿ ಸಮಾರಂಭವನ್ನು ಮಾಡುತ್ತದೆ. ಅದು ಅಲ್ಲಿಗೇ ಮುಕ್ತಾಯವನ್ನೂ ಕಂಡು ಮುಂದಿನ ವರ್ಷಕ್ಕೇ ನಮ್ಮ ನೆನಪು ಮತ್ತೆ ಆಗುತ್ತದೆ. ಇದು ಸಲ್ಲದು. ಜಿಲ್ಲಾಡಳಿತವು ತಮಗೂ ಸರಕಾರಿ ಉದ್ಯೋಗದಲ್ಲಿ ಮೀಸಲಾತಿಯನ್ನು ನೀಡಬೇಕು. ನಾವು ಅನ್ಯರಿಗಿಂತ ಉತ್ತಮವಾಗಿ ಕೆಲಸ ನಿಭಾಯಿಸಿ ತೋರಿಸಬಲ್ಲೆವು ಎಂಬ ಮಾತನ್ನು ಮುಕ್ತವಾಗಿ ಸರಕಾರದ ಮುಂದಿಟ್ಟಿದ್ದಾರೆ.

ತ್ರಿಚಕ್ರ ವಾಹನಗಳಿಗೆ ಪೆಟ್ರೋಲ್ ಸಬ್ಸಿಡಿ ಬೇಕು: ದೂರದ ಮುಂಬೈನಿಂದ ಆಗಮಿಸಿದ್ದ ವಿದ್ಯಾ ಶೆಟ್ಟಿ, ಮುಂಬಯಿನಲ್ಲಿ ಫಿಲ್ಮ್ ಶೂಟಿಂಗ್ ವೇಳೆ ಬಿದ್ದು ಕಾಲುಗಳ ಸ್ವಾಧೀನವನ್ನು ಕಳೆದುಕೊಂಡು ಈಗ ಅತ್ತಿತ್ತ ಓಡಾಡಲು ವೀಲ್ ಚಯರನ್ನೇ ಸದ್ಯ ನೆಚ್ಚಿಕೊಂಡಿದ್ದಾರೆ. ಶಶಿಧರ್ ಪೂಜಾರಿ ಅವರು ಲಿಪ್ಟ್‍ನಿಂದ ಬಿದ್ದು ಬೆನ್ನು ಹುರಿಯ ತೊಂದರೆಗೊಳಗಾಗಿ ಕಾಲಿನ ಸ್ವಾಧೀನವನ್ನು ಕಳೆದುಕೊಂಡಿದ್ದಾರೆ. ಶಾರದಾ ನೋಡಲು ಸುಂದರವಾಗಿದ್ದಾರೆ. ಆದರೆ ಕಾಲಲ್ಲಿ ಬಲವಿಲ್ಲ. ತೆವಳುತ್ತಲೇ ಸಾಗಬೇಕಾದ ಅನಿವಾರ್ಯತೆಯಿದೆ. ಸಂಕಷ್ಟಕ್ಕೆ ನಾವು ಒಳಗಾಗಿದ್ದರೂ ತಮ್ಮಲ್ಲಿ ಜೀವನೋತ್ಸಾಹವು ಕುಗ್ಗಿಲ್ಲ. ತಮ್ಮಲ್ಲಿ ಕೆಲವರಿಗೆ ಅನುಕಂಪದೊಂದಿಗೆ ರುಡ್‍ಸೆಟ್‍ನಲ್ಲಿ ವಾರದ ತರಬೇತಿ ಸಹಿತ ತ್ರಿಚಕ್ರ ವಾಹನಗಳನ್ನು ನೀಡಲಾಗಿದೆ. ಆದರೆ ತಾವು ಬಳಸುವ ಪೆಟ್ರೋಲ್‍ಗೂ ಜಿಲ್ಲೆಯಲ್ಲಿ ಮೀನುಗಾರರ ಬೋಟ್‍ಗಳಿಗೆ ನೀಡುವ ಡೀಸೆಲ್ ಸಬ್ಸಿಡಿಯಂತೆ ಸಬ್ಸಿಡಿ ನೀಡಬೇಕೆಂದು ಒಟ್ಟಾಗಿ ಆಗ್ರಹಿಸಿದ್ದಾರೆ.

ಸರಕಾರಿ ಕಚೇರಿ, ಸಾರ್ವಜನಿಕ ಸ್ಥಳಗಳಲ್ಲಿ ರ್ಯಾಂಪ್ ನಿರ್ಮಿಸಿ: ತಮಗೆ ಜಿಲ್ಲಾ ಸರಕಾರಿ ಕಚೇರಿಗಳಲ್ಲಿ ಒಳಗೆ ಸಾಗಲು ಅನುಕೂಲವಾಗುವಂತೆ ರ್ಯಾಂಪ್‍ಗಳನ್ನು ಕಡ್ಡಾಯವಾಗಿ ರಚಿಸಬೇಕು. ಇದೇ ರ್ಯಾಂಪನ್ನು ಪ್ರವಾಸೀ ಕೇಂದ್ರಗಳಾಗಿರುವ ಕಾಪು, ಪಡುಬಿದ್ರಿ ಬೀಚ್ ಸಹಿತ ಇತರೆಡೆಗಳಲ್ಲೂ ಅವಶ್ಯವಾಗಿ ನಿರ್ಮಿಸಬೇಕೆಂದು ಇವರು ಜಿಲ್ಲಾಡಳಿತಕ್ಕೆ ಮನವಿ ಮಾಡಿಕೊಂಡಿದ್ದಾರೆ.

ತಹಶೀಲ್ದಾರರ ಕಛೇರಿ ಮಹಡಿ ಏರಲಾಗದು: ಕಾಪು ತಾಲೂಕು ಕೇಂದ್ರವಾಗಿದೆ. ಆದರೆ ತಹಶೀಲ್ದಾರರನ್ನು ನಾವು ಭೇಟಿ ಮಾಡಲು ಮೊದಲನೇ ಮಹಡಿಯನ್ನು ಏರಬೇಕು. ಅಲ್ಲಿ ಲಿಫ್ಟ್‍ನ ಸೌಕರ್ಯವಿಲ್ಲ. ಸರಕಾರಿ ಕಚೇರಿಯ ಮಹಡಿ ಮೆಟ್ಟಿಲುಗಳನ್ನು ಬಳಸಿ ನಾವು ಮೇಲೇರಲಾಗುತ್ತಿಲ್ಲ. ಇದೇ ವೇಳೆ ನಾವು ಕೆಳಗಿದ್ದರೂ ತಮ್ಮ ಬಳಿ ಸಾಗಿ ಬರಲು ಅಧಿಕಾರಿಗಳಲ್ಲಿ ಸೌಜನ್ಯತೆಯೂ ಇಲ್ಲ.ಅಲ್ಲಿ ಅಗತ್ಯವಾಗಿ ಳಿಫ್ಟ್ ಸೌಕರ್ಯ ಒದಗಿಸಬೇಕು ಎಂದು ಎರ್ಮಾಳಿನ ಹಿದಾಯತುಲ್ಲಾ ಹೇಳಿಕೊಂಡರು.

ಕನಗವಲ್ಲಿ ಬಳಿಕ ಬೆಂಬಲಕ್ಕಿಲ್ಲದ ಅಧಿಕಾರಿ ವರ್ಗ: ವಿಶೇಷ ಚೇತನರ ಪರ ವಹಿಸಿ ಉಡುಪಿ ಜಿಲ್ಲೆಯಲ್ಲಿ ಕನಗವಲ್ಲಿ ಅವರು ಜಿ. ಪಂ. ಕಾರ್ಯನಿರ್ವಹಣಾಧಿಕಾರಿ ಆಗಿದ್ದಾಗ ಉತ್ತಮ ಕೆಲಸ ಕಾರ್ಯಗಳನ್ನು ಮಾಡಿದ್ದರು. ನಮಗೆ ಬೆಂಬಲವಾಗಿ ನಿಂತಿದ್ದರು. ಆ ಬಳಿಕ ಜಿಲ್ಲೆಯ ಯಾವನೇ ಅಧಿಕಾರಿ ನಮಗೆ ಯಾವುದೇ ಅನುಕೂಲತೆಗಳನ್ನು ಮಾಡಿಕೊಡುತ್ತಿಲ್ಲವೆಂದು ನಂದ್ಯಪ್ಪ ಶೆಟ್ಟಿ ಹೇಳಿದರಲ್ಲದೆ ನಮಗೆ ಅಗತ್ಯವಾಗಿ ಬೇಕಾದ ಸೌಲಭ್ಯಗಳನ್ನು ಒದಗಿಸಬೇಕೆಂದರು.

ಕಡ್ಡಾಯ ಮತದಾನಕ್ಕೆ ಮನವಿ: ಮತದಾನ ನಮ್ಮ ಹಕ್ಕು. ನಮ್ಮನ್ನೂ ಕಳೆದ ಬಾರಿ ಮತದಾನ ಕುರಿತಾದ ಜಾಗೃತಿಗೆ ಬಳಸಿಕೊಂಡಿದ್ದಾರೆ. ಈ ಬಾರಿಯೂ ಮಹಾ ಚುನಾವಣೆಯಲ್ಲಿ ನಾವೂ ಮತದಾನವನ್ನು ಅವಶ್ಯ ಮಾಡುವಂತೆ ಎಲ್ಲಾ ಮತದಾರರನ್ನೂ ವಿನಂತಿಸುತ್ತೇವೆ ಎಂದೂ ಕಾರ್ಕಳದ ಉಮೇಶ್ ಶೆಟ್ಟಿ ಮನವಿ ಮಾಡಿಕೊಂಡರು.

ಸಹಾನುಭೂತಿಯ ಅಗತ್ಯ ತಮಗಿಲ್ಲ. ತಮ್ಮ ಹಕ್ಕುಗಳನ್ನು ರಕ್ಷಿಸಿ. ಅವನ್ನು ತಮಗೆ ನೀಡಿ ಎಂಬ ಬೇಡಿಕೆಯೊಂದಿಗೆ ಪಡುಬಿದ್ರಿ ಬೀಚ್‍ನಲ್ಲಿ ಅಲ್ಲಿನ ಬೀಚ್ ಉಸ್ತುವಾರಿ ನೋಡಿಕೊಳ್ಳುವ ಸಾಯಿರಾಧ ಗ್ರೂಪ್‍ನ ಎಲ್ಲಾ ಸಿಬಂದಿಗಳಿಗೆ, ಗೃಹರಕ್ಷಕ ದಳ ಸಿಬಂದಿ ಮನೋಜ್‍ಗೆ ತಮ್ಮ ರಕ್ಷಣೆಯನ್ನು ನಿಭಾಯಿಸಿದಕ್ಕಾಗಿ ಕೃತಜ್ಞತೆಯನ್ನೂ ಇವರು ಸಲ್ಲಿಸಿದ್ದಾರೆ. ಪ್ರತೀ ವರ್ಷಕ್ಕೊಮ್ಮೆ ಒಂದೊಂದೆಡೆಯಲ್ಲಿ ತಾವು ಒಂದೇ ಕುಟುಂಬವೆಂಬ ನೆಲೆಯಲ್ಲಿ ಸೇರುತ್ತಿರುತ್ತೇವೆ ಎಂದೂ ಇವರೆಲ್ಲಾ ಸಂತಸದಿಂದ ಆಡಿಕೊಂಡಿದ್ದಾರೆ.

 

ಎಚ್ಕೆ ಹೆಜ್ಮಾಡಿ,ಪಡುಬಿದ್ರಿ