ಒಗ್ಗಟ್ಟಿನ ಪ್ರತಿಭಟನೆಯಿಂದ ಯಶಸ್ಸು ಖಚಿತ-ಕೇಮಾರು ಶ್ರೀ

ಪಡುಬಿದ್ರಿ –  ಟೋಲ್ ವಿರುದ್ಧ ಹೋರಾಟ 9ನೇ ದಿನಕ್ಕೆ- ಉಪವಾಸ ನಿರತ ಓರ್ವ ಆಸ್ಪತ್ರೆಗೆ ದಾಖಲು

ಪಡುಬಿದ್ರಿ: ಕಳೆದ 8 ದಿನಗಳಿಂದ ಟೋಲ್ ವಿನಾಯಿತಿಗಾಗಿ ಅನಿರ್ದಿಷ್ಠಾವಧಿ ಪ್ರತಿಭಟನೆ ಹಾಗೂ ಉಪವಾಸ ಸತ್ಯಾಗ್ರಹ ನಡೆಯುತ್ತಿದ್ದರೂ ಜಿಲ್ಲಾಧಿಕಾರಿ ಸಹಿತ ನವಯುಗ್ ಕಂಪನಿಯು ಯಾವುದೇ ಪ್ರತಿಕ್ರಿಯೆ ನೀಡದಿರುವುದು ಖೇದಕರ.ನಮ್ಮ ಬೇಡಿಕೆ ಈಡೇರುವವರೆಗೆ ಹೋರಾಟ ಮುಂದುವರಿಸೋಣ.ಪರಿಸರದ ಎಲ್ಲಾ ಸಂಘಟನೆಗಳು ಹೋರಾಟದಲ್ಲಿ ಸಕ್ರಿಯ ಭಾಗವಹಿಸಬೇಕು ಎಂದು ಕೇಮಾರು ಸಾಂದೀಪನಿ ಸಾಧನಾಶ್ರಮದ ಶ್ರೀ ಈಶ ವಿಠಲದಾಸ ಸ್ವಾಮೀಜಿ ಹೇಳಿದರು.

ಕಳೆದ 8 ದಿನಗಳಿಂದ ಪಡುಬಿದ್ರಿಯ ಟೆಂಪೋ ನಿಲ್ದಾಣದಲ್ಲಿ ಕರ್ನಾಟಕ ರಕ್ಷಣಾ ವೇದಿಕೆ(ಪ್ರವೀಣ್ ಶೆಟ್ಟಿ ಬಣ)ಯ ಉಡುಪಿ ಜಿಲ್ಲೆ ಮತ್ತು ಕಾಪು ಘಟಕದ ವತಿಯಿಂದ ಹೆಜಮಾಡಿಯ ನವಯುಗ್ ಟೋಲ್‍ನಲ್ಲಿ ಸ್ಥಳೀಯರಿಗೆ ವಿನಾಯಿತಿ ಮತ್ತು ಅವೈಜ್ಞಾನಿಕ ಹೆದ್ದಾರಿ ಕಾಮಗಾರಿ ವಿರುದ್ಧ ನಡೆಯುತ್ತಿರುವ ಅನಿರ್ದಿಷ್ಠಾವಧಿ ಪ್ರತಿಭಟನೆಯ 9ನೇ ದಿನವಾದ ಮಂಗಳವಾರ ಶ್ರೀಗಳು ಭಾಗವಹಿಸಿ ತಮ್ಮ ಬೆಂಬಲ ಘೋಷಿಸಿದರು.

ಅವಿಭಜಿತ ದಕ ಜಿಲ್ಲೆಯ ಟೋಲ್‍ಗಳಲ್ಲಿ ಹೊರ ರಾಜ್ಯದ ಕಾರ್ಮಿಕರೇ ತುಂಬಿದ್ದಾರೆ.ಅಲ್ಲದೆ ಅವರೆಲ್ಲಾ ಅಲ್ಲಿ ಗೂಂಡಾಗಿರಿಯಿಂದ ಟೋಲ್ ವಸೂಲಾತಿ ಮಾಡುತ್ತಿದ್ದಾರೆ.ಎಲ್ಲಾ ಟೋಲ್‍ಗಳಲ್ಲಿ ಸ್ಥಳೀಯರನ್ನೇ ನೇಮಿಸಿಕೊಳ್ಳಬೇಕು.ಸುರತ್ಕಲ್ ಟೋಲ್‍ನ್ನು ತಕ್ಷಣ ರದ್ದುಗೊಳಿಸಬೇಕು.ಹೆಜಮಾಡಿ ಟೋಲ್‍ನಲ್ಲಿ ಪಡುಬಿದ್ರಿ ಜಿಪಂ ವ್ಯಾಪ್ತಿಯ ವಾಹನಗಳಿಗೆ ಸುಂಕ ವಿನಾಯಿತಿ ಘೋಷಿಸಬೇಕು.ತಪ್ಪಿದಲ್ಲಿ ಉಗ್ರ ಹೋರಾಟಕ್ಕೆ ಚಾಲನೆ ನೀಡಲಾಗುವುದು ಎಂದರು.

ನಮ್ಮ ಹೋರಾಟ ನವಯುಗ್ ಮತ್ತು ಸರಕಾರದ ವಿರುದ್ಧವೇ ಹೊರತು ಪೋಲೀಸರ ವಿರುದ್ಧವಲ್ಲ.ಪೋಲೀಸರು ಸರಕಾರ ಮತ್ತು ಜನಪ್ರತಿನಿಧಿಗಳು ಹೇಳಿದಂತೆ ಮಾಡುವವರು.ಹಾಗಾಗಿ ಪೋಲೀಸರ ವಿರುದ್ಧ ಯಾವುದೇ ಘೋಷಣೆ ಕೂಗಬಾರದು ಎಂದವರು ವಿನಂತಿಸಿದರು.

ಹೋರಾಟಗಾರರು ಯಾವುದೇ ಕಾರಣಕ್ಕೂ ಆಸೆ ಆಮಿಷಗಳಿಗೆ ಬಲಿಬೀಳಬಾರದು.ಹಿಂದಿನ ಕೆಲವು ಹೋರಾಟಗಳ ಕಹಿ ನೆನಪು ಮರುಕಳಿಸಬಾರದು.ಅಂತಹ ಹೋರಾಟಕ್ಕೆ ನನ್ನ ಬೆಂನಲವಿಲ್ಲ ಎಂದವರು ಘೋಷಿಸಿ ಅವಿಭಜಿತ ದಕ ಜಿಲ್ಲೆ ಟೋಲ್ ಮುಕ್ತಗೊಳಿಸಲು ಇಲ್ಲರೂ ಒಗ್ಗಟ್ಟಾಗಿ ಹೋರಾಟ ನಡೆಸಬೇಕಾಗಿದೆ ಎಂದರು.

ಸೋಮವಾರದಿಂದ 100 ಗಂಟೆಗಳ ಉಪವಾಸ ಸತ್ಯಾಗ್ರಹ ಆರಂಭಿಸಿರುವ ಕರವೇ ಜಿಲ್ಲಾಧ್ಯಕ್ಷ ಅನ್ಸಾರ್ ಅಹಮದ್,ಕಾಪು ಘಟಕದ ಅಧ್ಯಕ್ಷ ಎಮ್‍ಎಸ್ ಸೈಯದ್ ನಿಜಾಮ್,ಸಮಾಜಸೇವಕ ಅಬ್ದುಲ್ ರಜಾಕ್‍ರವರಿಗೆ ಸಂಯಮ ವಹಿಸುವಂತೆ ಮನವಿ ಮಾಡಿದ ಕೇಮಾರು ಶ್ರೀಗಳು,ಯಾವುದೇ ಆಹಾರ ಸೇವಿಸದೆ ದೇಹವನ್ನು ದಂಡಿಸಬಾರದು.ಉಪವಾಸ ಸತ್ಯಾಗ್ರಹ ಮಾಡುವುದಿದ್ದರೂ ಕನಿಷ್ಟ ನೀರನ್ನಾದರೂ ಸೇವಿಸಬೇಕೆಂದು ವಿನಂತಿಸಿ ಮೂವರಿಗೂ ನೀರು ಕುಡಿಸಿದರು.

ಕರವೇ ರಾಜ್ಯಾಧ್ಯಕ್ಷ ಪ್ರವೀಣ್ ಶೆಟ್ಟಿ ಹೋರಾಟದಲ್ಲಿ ವೇದಿಕೆಯ ಸದಸ್ಯರಿಗೆ ಸಾಥ್ ನೀಡಿ,ನಮ್ಮ ಹೋರಾಟ ಗೆಲುವು ಸಿಗುವವರೆಗೆ ಸಾಗಲಿದೆ.ಟೋಲ್‍ಗಳಲ್ಲಿ ಹಿಂದಿ ಭಾಷಿಗರೇ ತುಂಬಿದ್ದು ಅವರ ಬದಲು ಕನ್ನಡಿಗರನ್ನೇ ನೇಮಿಸಬೇಕು.ಪಡುಬಿದ್ರಿಯ ಹೋರಾಟ ಸ್ಥಳಕ್ಕೆ ಜಿಲ್ಲಾಧಿಕಾರಿಗಳು ಜನಪ್ರತಿನಿಧಿಗಳು ತಕ್ಷಣ ಭೇಟಿ ನೀಡಬೇಕು.ನಮ್ಮ ಬೇಡಿಕೆಯನ್ನು ತಕ್ಷಣ ಈಡೇರಿಸಬೇಕು.ತಪ್ಪಿದಲ್ಲಿ ಶೀಘ್ರದಲ್ಲೇ ಪಡುಬಿದ್ರಿ ಬಂದ್ ಮೂಲಕ ಎಚ್ಚರಿಕೆ ನೀಡಲಿದ್ದೇವೆ.ಅದಕ್ಕೂ ಬಗ್ಗದಿದ್ದರೆ ಟೋಲ್ ಧ್ವಂಸ ಮಾಡುವುದು ಖಚಿತ.ಮುಂದೆ ಆಗುವ ಅನಾಹುತಗಳಿಗೆ ಜಿಲ್ಲಾಡಳಿತವೇ ನೇರ ಹೊಣೆಯಾಗಲಿದೆ ಎಂದು ಎಚ್ಚರಿಸಿದರು.

ಪಡುಬಿದ್ರಿ ಬಿಲ್ಲವರ ಸಂಘ ಬೆಂಬಲ: ಪ್ರತಿಭಟನೆಗೆ ಮಂಗಳವಾರ ಪಡುಬಿದ್ರಿ ಬಿಲ್ಲವರ ಸಂಘವು ಬೆಂಬಲ ನೀಡಿ ನೂರಾರು ಸದಸ್ಯರು ಭಾಗವಹಿಸಿದರು.ಸಂಘದ ಅಧ್ಯಕ್ಷ ವೈ.ಸುಧೀರ್ ಕುಮಾರ್ ಮಾತನಾಡಿ,ನಮ್ಮ ಶಾಂತಿಯುತ ಪ್ರತಿಭಟನೆಗೆ ಮಣಿದು ತಕ್ಷಣ ಬೇಡಿಕೆ ಈಡೇರಿಸಬೇಕು.ನಮ್ಮ ತಾಳ್ಮೆ ಪರೀಕ್ಷಿಸಬೇಡಿ.ನಾವು ಉಗ್ರ ಹೋರಾಟಕ್ಕೂ ಸಿದ್ಧ ಎಂದರು.

ಕರವೇ ರಾಜ್ಯ ಉಪಾಧ್ಯಕ್ಷ ಪ್ರಸನ್ನ ಕುಮಾರ್ ಹೆಬ್ರಿ,ರಾಜ್ಯ ಉಪಾಧ್ಯಕ್ಷ ಶಿವರಾಜು ಗೌಡ,ಹಾಸನ ಜಿಲ್ಲಾಧ್ಯಕ್ಷ ಸತೀಶ್ ಪಟೇಲ್,ಕಾಪು ಬ್ಲಾಕ್ ಕಾಂಗ್ರೆಸ್ ಪೂರ್ವಾಧ್ಯಕ್ಷ ನವೀನ್‍ಚಂದ್ರ ಜೆ.ಶೆಟ್ಟಿ ಮಾತನಾಡಿದರು.
ದಸಂಸ ಪಡುಬಿದ್ರಿ ಘಟಕದ ಸಂಚಾಲಕ ಲೋಕೇಶ್ ಕಂಚಿನಡ್ಕ,ಗ್ರಾಪಂ ಸದಸ್ಯರಾದ ಕರುಣಾಕರ ಪೂಜಾರಿ,ಲಕ್ಷ್ಮಣ ಅಮೀನ್ ಮತ್ತು ಹಸನ್ ಬಾವ,ಡಾ.ಎನ್.ಟಿ.ಅಂಚನ್,ಹಮೀದ್ ಹೆಜ್ಮಾಡಿ,ಆಸಿಫ್ ಆಪತ್ಬಾಂಧವ,ಚಂದ್ರ ಪೂಜಾರಿ,ಭರತ್,ನಾಸಿರ್,ಶಫಿ ಎಂ.ಎಸ್.,ಲಕ್ಷ್ಮೀನಾರಾಯಣ ಮತ್ತಿರರು ಉಪಸ್ಥಿತರಿದ್ದರು.

ಉಪವಾಸ ನಿರತರ ಆರೋಗ್ಯದಲ್ಲಿ ಏರುಪೇರು: ಪಡುಬಿದ್ರಿ ಪ್ರಾಥಮಿಕ ಆರೋಗ್ಯ ಕೇಂದ್ರ ವೈದ್ಯಾಧಿಕಾರಿ ಡಾ.ಬಿ.ಬಿ.ರಾವ್ ಮಂಗಳವಾರ ಬೆಳಿಗ್ಗೆ ಆಗಮಿಸಿ ಮೂವರ ಆರೋಗ್ಯ ತಪಾಸಣೆ ಮಾಡಿದಾಗ ಅನ್ಸಾರ್ ಅಹಮದ್ ಮತ್ತು ಅಬ್ದುಲ್ ರಜಾಕ್‍ರ ಆರೋಗ್ಯ ಸ್ಥಿರವಾಗಿದ್ದರೂ ನಿಜಾಮ್‍ರವರು ಅತಿ ರಕ್ತದೊತ್ತಡದಿಂದ ಬಳಲುತ್ತಿರುವುದನ್ನು ಕಂಡುಕೊಂದಿದ್ದರು.
ಈ ಹಿನ್ನೆಲೆಯಲ್ಲಿ ಪಡುಬಿದ್ರಿ ಪೋಲೀಸರು ಅವರನ್ನು ಬಲವಂತವಾಗಿ ಮಣಿಪಾಲ ಕೆಎಮ್‍ಸಿ ಆಸ್ಪತ್ರೆಗೆ ದಾಖಲಿಸಿದ್ದಾರೆ.